काठमाडौं। नेपाल स्टक एक्स्चेन्ज (नेप्से)ले दुई वाणिज्य बैंकको सेयर कारोबार रोक्का गरेको छ । एकआपसमा मर्जरमा जाने सम्झौता गरेसँगै आजदेखि कुमारी बैंक र एनसीसी बैंकको सेयर कारोबार रोक्का भएको हो ।
सोमबार दुई बैंकले एकआपसमा मर्जरमा जाने सम्झौता गरेको थिए । सम्झौता पत्रमा एनसीसी बैंकका मर्जर कमिटी संयोजक चन्द्र बाँस्तोला र कुमारी बैंकका मर्जर कमिटीका संयोजक कृष्णप्रसाद ज्ञवालीले हस्ताक्षर गरेका छन्।
दुवै बैंक १:१ सेयर अनुपातमा मर्ज हुने जनाइएको छ । हाल कुमारी बैंकको चुक्ता पूँजी १४ अर्ब ७१ करोड रुपैयाँ छ भने एनसीसीको ११ अर्ब १३ करोड रहेको छ । मर्जरपछि बन्ने नयाँ बैंकको चुक्ता पूँजी २५ अर्ब ८४ करोड रुपैयाँ पुग्ने छ ।
यस्तै, कुमारीको जगोडा कोष ४ अर्ब ६१ करोड, रिटेन्ड अर्निङमा १ अर्ब ७७ करोड छ भने एनसीसीको जगेडा कोषमा ३ अर्ब ८४ करोड र सेयर रिटेन्ड अर्निङमा १ अर्ब ४७ करोड रुपैयाँ छ ।
नयाँ बैंकको कुल पूँजी कोष ३७ अर्ब ५३ करोड रुपैयाँ हुनेछ । बैंकको निक्षेप ३ खर्ब ११ अर्ब ३४ करोड र कर्जा लगानी २ खर्ब ७४ अर्ब ५५ करोड हुनेछ।
