काठमाडौं । शिव श्री हाइड्रोपावरको ३३ लाख ५१ हजार १४० कित्ता प्राथमिक साधरण सेयर (आइपीओ) आज (असोज १६) देखि बिक्री खुल्ला भएको छ । कम्पनीले प्रतिकित्ता १ सयका दरले ३३ करोड ५१ लाख १४ हजार रुपैयाँ बराबरको आइपीको निष्काशन गरेको हो ।
कम्पनीले यसअघि आयोजना प्रभावित स्थानीयले नकिनेको ११ लाख ३६ हजार ५४० कित्ता र सर्वसाधारणलाई छुट्याइएको २२ लाख १४ हजार ६ सय कित्ता गरी कुल ३३ लाख ५१ हजार १४० कित्ता आइपीओ बिक्री खुला गरेको हो । यसमध्ये २ लाख ६८ हजार ०९१ कित्ता कर्मचारीको लागि छुट्याइएको छ ।
कम्पनीले यसअघि स्थानीयलाई १४ लाख ७६ हजार ४०० कित्ता आइपीओ निष्कासन गरेकोमा ३ लाख ३९ हजार ८३० कित्ता सेयर मात्र बिक्री भएको थियो ।
यस आइपीओमा असोज २४ गतेसम्म आवेदन दिन पाइनेछ । यस अवधिमा सबै सेयर बिक्री नभएमा भने कात्तिक १५ गतेसम्म भर्न सकिने बिक्री प्रबन्धकले जानकारी दिएको छ ।
यसमा न्यूनतम १० कित्तादेखि अधिकतम १० लाख कित्तासम्मका लागि आवेदन दिन पाइनेछ । लगानीकर्ताले सी–आस्वाको माध्यमबाट आवेदन दिन सक्नेछन् ।
यस आइपीओको बिक्री प्रबन्धकको काम सिद्धार्थ क्यापिटलले गरेको छ । क्रेडिट रेटिङ कम्पनी केयर रेटिङ नेपालले यो आइपीओलाई औसत भन्दा तल जनाउने ‘ग्रेड ४’ रेटिङ दिएको छ ।
शिव श्रीले सिन्धुपाल्चोक जिल्लामा २२.२ मेगावटको उपर चाकु “ए” जालविद्युत आयोजना निर्माण गरिरहेको छ । यसको कूल लागत ४ अर्ब ९८ करोड ५९ लाख रुपैयाँ रहेको छ । यसको प्रतिमेगावट लागत २२ करोड ४५ लाख ९४ हजार रहेको छ ।
शिव श्री चालू आर्थिक वर्षमा आइपीओ बिक्री गर्ने पहिलो कम्पनी हो ।
