काठमाडौं । सेयर बजारमा दोहोरो अंकको गिरावट आएको छ । अघिल्ला दुई कारोबार दिनमा झिनो अंकले बढेको नेप्से आज दोहोरो अंकले घटेको हो ।
सूचकमा गिरावट आए पनि कारोबार रकममा भने बढोत्तरी आएको छ । अघिल्लो दिनको तुलनामा कारोबार रकम १९ करोड बढेर पौने २ अर्ब पुगेको छ ।
बिहीबार नेप्से १८.३० अंकले घटेर २०३९.५४ विन्दुमा आइपुगेको छ । नेप्सेका अनुसार २१९ कम्पनीको १ अर्ब ७१ करोड ७४ लाख ६९ हजार ६७० रुपैयाँ बराबरको ४२ लाख ३४ हजार १३७ कित्ता सेयर किनबेच भएको छ ।
आज कारोबारमा आएका १३ वटै उपसमूहको परिसूचक राताम्मे भएको छ । अन्य समूह सबैभन्दा धेरै २.२० प्रतिशतले घटेको छ । त्यस्तै, फाइनान्स समूह पनि २ प्रतिशतभन्दा धेरैले घटेको छ ।
आज हिमाल दोलखा हाइड्रोपावरको सर्वाधिक कारोबार भएको छ । यसको ११करोड रुपैयाँ बढीको सेयर किनबेच भएको छ । त्यस्तै, रिडी पावर ९ करोड र नेष्डो लघुवित्त ८ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा आज मैलुङखोला जलविद्युत्का सेयरधनीले सबैभन्दा धेरै ५.८२ प्रतिशत गुमाएका छन् ।
त्यसैगरी, मल्टीपर्पस फाइनान्स ४.२७, खानीखोला हाइड्रोपावर ४.१८, सूर्योदय वोमी लघुवित्त ४.०९, दोर्दीखोला, छ्याङ्दी, न्यादी, रिभर फल्स पावर, गुह्येश्वरी मर्चेन्ट र ओरेन्टल होटलको सेयरमूल्य साढे ३ प्रतिशतले घटेको छ ।
