काठमाडौं । चाडपर्वको सिजन सुरू भएसँगै सडक विभागले देशभरका मुख्य सडकको खाल्डाखुल्डी पुर्ने योजना बनाएको छ ।
अन्य समयमाभन्दा चाडपर्वको बेला धेरै मानिसले आवतजावत गर्ने भएकाले त्यसलाई मध्येनजगर गर्दै सडक विभागले मुख्य राजमार्गका खाल्डाखुल्डी पुर्ने योजना बनाएको हो ।
वर्षाका कारण देशभरका मुख्य सडकमा खाल्डाखुल्डी बनेकाले यात्रुको सुविधाका लागि दशैंअघि नै मर्मतसम्भार गर्ने योजना बनाइएको विभागले जनाएको छ ।
सडक विभागका प्रवक्ता भीमार्जुन अधिकारीले यो वर्ष पनि राजमार्गहरूमा पटके मर्मत गरिने बताए । उनले दशैँ अघि धेरै गाडी चल्नु पर्ने भएकाले सडकलाई पटल फ्री (खाल्डाखुल्डी रहित) बनाउने बताए ।
भदौ तेस्रो सातादेखि देशभरका डिभिजनमार्फत खाल्डाखुल्डी पुर्ने काम सुरू गर्नेगरी तयारी गरिएको उनले बताए । ‘अझै पानी परिरहेकोले धेरै काम गर्न सकेका छैनाैं, दशैँ अघि यात्रा गर्नेलाई सहज होस भनेर सडक पटल फ्री बनाउने छाैं,’ अधिकारीले चाणक्य पोष्टसँग भने ।
उनले विशेष गरी राजमार्गहरूमा यस्तो काम गरिने बताए । बाढी पहिरोका कारण बिग्रेका सडकहरूमा एकतर्फी भए पनि सडक खुल्ला गरेर काम गरिने उनले बताए । उनले पृथ्वी राजमार्ग, पूर्वपश्चिम राजमार्ग, हुलाकी राजमार्ग र स्तरोन्नती भइरहेका सडकहरूमा विशेष गरी सडकलाई सहज बनाउने काम गरिने बताए ।
वर्षामा धेरै मर्मत सम्भार गर्दा टिकाउ नहुने भन्दै उनले हाल अत्यावश्यक मर्मतको काम भइरहेको बताए । सडकको अवस्थाका कारण र क्षमताभन्दा बढी यात्रु बोक्ने कारण हरेक वर्ष दशैँमा सडक दुर्घटना हुने गरेको छ ।
प्रवक्ता अधिकारीका अनुसार देशभरका डिभिजनहरूले सडक मर्मतको काम गर्ने छन् । देशभर ३३ वटा डिभिजन कार्यालयहरू रहेका छन् । यी डिभिजनले ८० वटा राजमार्गको नेटवर्कको मर्मत सम्भारको काम गर्ने छ ।
कुन प्रदेशमा कुन डिभिजनले गर्छ मर्मत?
डिभिजन अनुसार हरेक ८/१० किलोमिटर दुरीमा मेसिन र कर्मचारी तैनाथ गरी सडक मर्मत गरिने अधिकारीले बताए ।
सुर्खेत डिभिजनले ७ र ६ प्रदेशको मर्मत सम्भार हेर्ने गरेको छ । पोखरा डिभिजनले ४ र ५ प्रदेशको मर्मत सम्भारको जिम्मा पाएको छ ।
दमक र हेटौंडा डिभिजनले प्रदेश २ र १ प्रदेशको सडक मर्मत सम्भार गर्ने गरेको छ । काठमाडौं डिभिजनले ३ नम्बर प्रदेशको मर्मत सम्भारको जिम्मा पाएको छ ।
२१८ सडक मर्मत गर्ने हेभी इक्यूपमेन्ट
भौतिक पूर्वाधार तथा यातायात मन्त्रालयसँग २१८ हेभी इक्यूपमेन्टहरू छन् । एक्स्लाभेटर, लोडर, टिपर, ट्रक, रक ब्रेकर, डम्पर, रोडबेड टेलर लगायतका उपकरणहरू रहेका छन् ।
यान्त्रीक कार्यलयका ९ वटा डिभिजन छन् । यी सबै डिभिजनमा इन्जिनीयर र सब इन्जिनीयर हुन्छन् । इन्धन आपूर्ति डिभिजन कार्यालयबाट आपूर्ती गरिन्छ । कुनै मेसिन बिग्रेको भए यस्ता स्टान्ड वाई राखिएका उपकरणहरूसँग परिवर्तन गरी प्रयोग गरिने गरेको प्रवक्ता अधिकारीले बताए ।
सडक मर्मतसम्भार गर्न सरकारसँग ४२ वटा लोडर, जेसीभी टाइपको ब्याक होल्ड लोडर ३२ वटा, एस्काभेटर २५ वटा, ट्रिपर ३५ वटा, रोडबेड टेलरहरू १२ वटा लगायत हेभी उपकरण रहेका छन् ।
यस्ता सवारी साधन विशेष गरी बाढी पहिरो आउँदा र मर्मत सम्भारका बखत प्रयोग गरिने गरेको अधिकारीले बताए । उनले यसरी दशैँअघि हुने मर्मतका लागि करोडभन्दा कम नै खर्च हुने बताए ।
