काठमाडौं । भारत विश्वकै सबैभन्दा अग्लो रेलवे पुल निर्माण गरिरहेको छ । मणिपुर राज्यको राजधानी इम्फाल नजिकै १४१ मिटर अग्लो रेलवे पुल निर्माण गरिरहेको हो ।
इम्फाल र जिरीविम जोड्ने १११ किलोमिटर रेलवे लाइनको नोने भन्ने स्थानमा विश्वकै अग्लो रेलवे पुल निर्माण सम्पन्न हुने क्रममा रहेको हो ।
उक्त पुलको करिब ७५ प्रतिशत काम पूरा भइसकेको छ । पुलको उचाइ १४१ मिटर र लम्बाइ ७०३ मिटर रहेको छ ।
पहाडी राज्य मणीपुरमा निर्माणाधीन यस रेलवे लाइनमा ५२ वटा सुरुङमार्ग रहेका छन् भने १२९ वटा पुल मध्ये ११ वटा ठूला पुल रहेका छन् । ती मध्येकै नोनेपुल सबैभन्दा उच्च स्थानको पुल भएको भारतीय रेलवेले बताएको छ ।
यो पुल निर्माणपछि १२ घण्टा लाग्ने यात्राको दूरी साढे दुई घण्टामा छोटिने बताइएको छ । एजेन्सी
