काठमाडौं । मर्जरमा गएर दोस्रो बजारमा सेयर कारोबार रोक्का भएको रिलायन्स लाइफको सेयर मूल्यमा आज पोजेटिभ सर्किट लागेको छ ।
सानिमा लाइफ इन्स्योरेन्ससँग मर्जरमा गएपछि असार २९ गतेदेखि सेयर कारोबार रोक्का भएको कम्पनीको आज सेयर मूल्य १० प्रतिशत बढेको हाे । ३४१.७० रुपैयाँमा कारोबार खुलेको कम्पनीको सेयर मूल्य प्रतिकित्ता ३३.५० रुपैयाँ बढेर ३६८.५० रुपैयाँ पुगेको छ ।
शुक्रबार बिहान ११:४५ बजेसम्म रिलायन्सको १६ पटकको कारोबार मार्फत २ लाख २४ हजार १२६ रुपैयाँ बराबरको ६१० कित्ता सेयर कारोबार भएको हो ।
मर्जरमा गएका कम्पनीको सेयर एकीकृत कारोबार नहुन्जेल रोक्का हुने भए पनि भुलबस आज कारोबारमा आएको नेप्सेले जनाएको छ । कारोबारमा आएको केहीबेरमै सबैभन्दा धेरै मूल्य बढ्ने कम्पनीकाे शीर्ष स्थानमा आएपछि नेप्सेले थाहा पाएको थियो ।
सेयर कारोबार खुलेको थाहा पाए लगत्तै नेप्सेले पुनः कारोबार रोक्का गरेको हो । १२ बजेपछि रिलायन्सको नाम सेयर कारोबार गर्न पाउने कम्पनीको लिस्टबाटै हटाइएको छ ।
