काठमाडौं । साढे २ वर्ष अघि सुरू गरिएको काठमाडौं उपत्यकामा विद्युतीय तार भूमिगत गर्ने कार्यले अपेक्षित गति लिन सकेको छैन । २०७६ फागुन ५ गते पूर्व प्रधानमन्त्री केपी शर्मा ओलीले धुमधामका साथ उद्घाटन गरेको विद्युतीय तार भूमिगत गर्ने कार्यले गति लिन नसकेको हो ।
सुरूआति समयमा कामले गति लिए पनि पछिल्लो समय भने सुस्त भएको छ । सडक खन्न अनुमति नपाउँदा र कोरोनाका कारण काममा ढिलाइ भएको विद्युत् प्राधिकरणले बताएको छ ।
३० महिना भित्र सम्पन्न गर्ने लक्ष्य साथ सुरू भएको यो आयोजनाको म्याद सकिन अब ५ महिना मात्र बाँकी रहेको छ । पछिल्लो समय महाराजगञ्ज र रत्नपार्क खण्डका विद्युतीय तार भूमिगत गर्ने कामले गति लिन सकेको छैन ।
महाराजगञ्ज खण्डमा कुल ६५० किलोमिटर केबल लेन्थिङ कार्य गर्नुपर्नेमा हालसम्म ६८ प्रतिशत काम पूरा भइसकेको आयोजना प्रमुख अभिषेक अधिकारीले बताए । उनले केबल भूमिगत गर्ने काम ६५ प्रतिशत सकिएको र पाइपको काम ६८ प्रतिशत सकिएको बताए ।
उनले रिङरोड र सडक विभाग अन्तर्गतका केही सडकमा तार भूमिगतको काम गर्न बाँकी रहेको बताए । ‘सडक विभागबाट अनुमति नपाएको कारणले रिङरोड र अन्य केही सडकमा तार भूमिगत गर्न बाँकी रहेको छ, भदौसम्म अनुमति पायो भने कामले गति पाउनेछ,’ अधिकारीले चाणक्य पोष्टसँग भने ।
सांग्रीला होटल, महाराजगञ्ज, लैनचौर क्षेत्रमा विद्युतीय तार भूमिगतको काम सम्पन्न भइसकेको उनले बताए । बाँसबारीदेखि बुढानिलकण्ठ क्षेत्रमा समेत तार भूमिगतको काम सम्पन्न भइसकेको छ । हाल महाराजगञ्ज-बुढानिलकण्ठ क्षेत्रमा साढे १ किलोमिटर हाराहारीमा विद्युतीय तार भूमिगत गर्ने काम बाँकी रहेको उनले बताए ।
महाराजगञ्जदेखि नारायण गोपाल चोकमा रोड परमिट नपाएका कारण विद्युतीय तार भूमिगतको काम अघि बढ्न नसकेको उनले जानकारी दिए । परमिट पाएको केही समयमै उक्त स्थानमा समेत भूमिगतको काम सुरू गरिने बताए ।
यस्तै रत्नपार्क खण्डमा कुल ६ सय किलोमिटर मध्ये २ सय किलोमिटरमा मात्र विद्युतीय तार भूमिगत भएको आयोजना प्रमुख सुमन श्रेष्ठले बताए । उनका अनुसार टेकु, चाबहिल, सामाखुसी, महाँकाल लगायतका क्षेत्रमा तार भूमिगत गर्ने काम भइसकेको छ ।
उनले २१५ किलोमिटरमा तार भूमिगतको काम भइसकेको बताए भने २२० किलोमिटर पाइप लगाइ सकेको बताए । रत्नपार्क खण्डमा बागबजार, पुतली सडक, टेकु, सोह्रखुट्टे, लाजिम्पाट, बालुवाटारसम्म विद्युतीय तार भूमिगत गर्ने गरी सम्झौता भएको थियो ।
उपत्यकाको ४०० किलोमिटर क्षेत्रका १ लाख घरधुरीमा विद्युतीय तार भूमिगत गरिसक्ने योजना सहित भारतीय कम्पनी केईआइ इण्डष्ट्रिजसँग ठेक्का सम्झौता गरिएको थियो ।
विगतमा कोभिडका कारणले गति लिन नसकेको यस आयोजनाले अझै पनि राम्रो काम हुन सकेको छैन । २०७९ पुष महिना भित्र सम्पन्न हुने यो आयोजनाले अझै भने जस्तो गति लिन सकेको छैन ।
यस्तै ललितपुर, भक्तपुर, पोखरा, भरतपुर लगायतका क्षेत्रमा विद्युतीय तार भूमिगत गराउने तयारी भइरहेको थियो ।
