काठमाडौं । अर्थमन्त्री जनार्दन शर्माको राजीनामाले सेयर लगानीकर्ता उत्सातिहत भएको देखिएन । लगानीकर्ताले शर्मालाई सेयर बजार विरोधी अर्थमन्त्रीको रुपमा बुझ्दै आएका थिए भने उनको राजीनामा समेत मागेका थिए ।
तर, अर्थमन्त्री शर्माले राजीनामा दिए पनि सेयर बजारमा भने सकारात्मक असर परेन । शर्माको राजीनामापछि बिहीबार सेयर बजारमा दोहोरो अंकको गिरावट आएको छ ।
आज नेप्से १६.६० अंकले घटेर २०२७.३२ विन्दुमा आइपुगेको छ । यसदिन २२९ कम्पनीको १ अर्ब ८० करोड ६२ लाख ४ हजार ७६५ रुपैयाँ बराबरको ४७ लाख ११ हजार २५ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये म्युचुअल फण्ड बाहेक बाँकी सबै समूहको परिसूचक राताम्मे भएको छ । अन्य समूह सबैभन्दा धेरै १.४३ प्रतिशतले घटेको छ । त्यस्तै, व्यापार, होटल, विकास बैंक र जीवन बीमा समूह्को परिसूचक पनि १ प्रतिशतभन्दा धेरैले घटेको छ ।
आज लाइफ इन्स्योरेन्स कर्पोरेशनको सर्वाधिक कारोबार भएको छ । यसको साढे ७ करोड रुपैयाँ बढीकोे सेयर किनबेच भएको छ । त्यसैगरी, अरुण काबेली र शिवम् सिमेन्टको ६/६ करोड बढीको कारोबार हुँदै शीर्ष तीनमा रहे ।
दोहोरो अंकले घटेको बजारमा आज समिट लघुवित्तको सेयर मूल्य सबैभन्दा धेरै ५.२० प्रतिशत गुमाएका छन् । त्यसैगरी, लिबर्टी इनर्जी ५, राष्ट्रिय बीमा कम्पनीको प्रमोटर सेयर ४.९३, नयाँ सारथी लघुवित्त, गुराँस लघुवित्त, युनाइटेड इन्स्योरेन्स, प्रभु लाइफ र शिव श्री हाइड्रोपावरका सेयरधनीले साढे ३ प्रतिशत गुमाएका छन् ।
