काठमाडौं । सेयर बजारले कमब्याक गरेको छ । यससाताका अघिल्ला दुई कारोबार दिनमै ८६ अंकले घटेको नेप्से आज उच्च अंकले बढेको हो ।
मंगलबार नेप्से ३७.४९ अंकले बढेर १९२२.३० विन्दुमा पुगेको छ । आज २३१ कम्पनीको १ अर्ब २३ करोड ८५ लाख १८हजार २०१ रुपैयाँ बराबरको ३७ लाख १२ हजार ७४६ कित्ता सेयर किनबेच भएको छ ।
कारोबारमा आएका १३ वटै समूहको परिसूचकमा हरियाली छाएको छ । विकास बैंक समूह सबैभन्दा धेरै ३.८९ प्रतिशतले बढेको छ । त्यस्तै, म्युचुअल फण्ड र फाइनान्स समूह पनि ३ प्रतिशतले बढेको छ ।
आज नेपाल टेलिकमको सर्वाधिक कारोबार भएको छ । यसको पौने १२ करोड रुपैयाँ बढीकोे सेयर किनबेच भएको छ । त्यसैगरी, नबिल बैंक ४ करोड र अरुण भ्याली हाइड्रोपावर ३ करोडको कारोबार हुँदै शीर्ष तीनमा रहे ।
उच्च अंकले बढेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । आँधिखोला लघुवित्त, सीवाइसी लघुवित्त र सप्तकोशी डेभलपमेन्ट बैंकको सेयर मूल्य करिब १० प्रतिशतले बढेको छ ।
त्यसैगरी, सामुदायिक लघुवित्त ८.९८, रिभर फल्स पावर ८.८८, शिवश्री हाइड्रोपावर ८.३४, हिमाल दोलखा हाइड्रोपावर, राष्ट्रिय बीमा कम्पनीको प्रमोटर सेयर र इिफिन्टी लघुवित्तको सेयर मूल्य ७ प्रतिशतभन्दा धेरैले बढेको छ ।