काठमाडौं । सेयर बजारमा कमब्याक भएको छ । गत बिहीबारदेखि लगातार ओरालो लागेको नेप्सेमा झन्डै १५० अंकको गिरावट पछि आज दोहोरो अंकले फर्केको हो ।
सूचकमा सुधार आए पनि कारोबार रकममा भने झनै सुस्ताएको छ । अघिल्लो कारोबार दिनको तुलनामा आज कारोबार रकम २९ करोडले घटेर सवा १ अर्बभन्दा कममा सीमित भएको छ ।
बिहीबार नेप्से १२.५७ अंकले बढेर १९७८.९४ विन्दुमा पुगेको छ । यसदिन २२१ कम्पनीको १ अर्ब १८ करोड ७१ लाख ४५ हजार ५१९ रुपैयाँ बराबरको ३५ लाख ९४ हजार ५९४ कित्ता सेयर किनबेच भएको छ ।
आज कारोबारमा आएका १३ वटा उपसमूहमध्ये जीवन बीमा र लगानी बाहेक बाँकी सबै समूहको परिसूचकमा हरियाली छाएको छ । अन्य समूह सबैभन्दा धेरै २.८१ प्रतिशतले बढेको छ ।
आज नेपाल टेलिकमको सर्वाधिक कारोबार भएको छ । यसको झन्डै १४ करोड रुपैयाँ बढीकोे सेयर किनबेच भएको छ । त्यसैगरी, एनसीसी बैंकको १० करोड र सिभिल बैंकको साढे ४ करोड बढीको कारोबार हुँदै शीर्ष तीनमा रहे ।
दोहोरो अंकले बढेको बजारमा आज ३ कम्पनीको सेयर मूल्यमा पोजेटिभ सर्किट लागेको छ । आँधिखोला लघुवित्तको सेयर मूल्य ठ्याक्कै १० प्रतिशतले बढेको छ भने रिभर फल्स पावर र सामुदायिक लघुवित्तका सेयरधनीले करिब १० प्रतिशत कमाएका छन् ।
त्यसैगरी, किसान लघुवित्त ७.६९, एनसीसी बैंक ६.६५, लिबर्टी इनर्जी ५.२९, सपोर्ट माइक्रोफाइनान्स ५.०२, माछापुच्छे बैंक ४.०६, ओरेन्ट होटलको सेयर मूल्य ४.०२ प्रतिशतले बढेको छ ।
