काठमाडौं । सरकारले पूँजी बजारमा देखिएका समस्या समाधान गर्न एक समिति गठन गरेको छ । पछिल्लो केही महिना यता सेयर बजार निरन्तर घटेपछि देखिएका समस्या समाधान गर्न भन्दै अर्थ मन्त्रालयले एक समिति गठन गरेको हो ।
अर्थमन्त्री जनार्दन शर्माले नेपाल धितोपत्र बोर्डका अध्यक्ष रमेशकुमार हमाल र नेपाल राष्ट्र बैंकका गभर्नर महाप्रसाद अधिकारीलाई मन्त्रालय डाकेर समस्या समाधानका लागि समिति गठन गरेका हुन् ।
अर्थमन्त्री शर्माले बुधबार नेपाल धितोपत्र बोर्डको ३० औं वार्षिकोत्सवमा आयोजित कार्यक्रमलाई सम्बोधन गर्दै पूँजी बजारको समस्या समाधान गर्न ४ सदस्यीय समिति बनाइएको जानकारी दिए ।
उनका अनुसार धितोपत्र बोर्डका कार्यकारी निर्देशक संयोजकत्वमा समिति गठन गरिएको हो । समितिका सदस्यमा राष्ट्र बैंक, अर्थमन्त्रालय र धितोपत्र बोर्डबाट अर्को एक जना प्रतिनिध रहनेछन् ।
समिति गठन भए पनि सदस्यहरुको नामवली टुंगो लागेको छैन । राष्ट्र बैंक, मन्त्रालय र बोर्डले नाम पठाएपछि समितिले औपचारिक रुपमा काम सुरु गर्नेछ ।
