काठमाडौं । अब जग्गाको क्षेत्रफलको साढे ४ गुणासम्म ठूलो भवन बनाउन पाइने भएको छ । सहरी विकास मन्त्रालयले ‘बस्ती विकास, सहरी योजना तथा भवन निर्माणसम्बन्धी आधारभूत निर्माण (दोस्रो संशोधन) मापदण्ड, २०७८’ जारी गर्दै यस्तो व्यवस्था गरेको हो ।
प्रमुख सहरी क्षेत्रमा खाली जग्गा पाउनै मुस्किल भएपछि बहुतले भौतिक संरचना निर्माणलाई प्राथमिकता दिँदै सरकारले भवन निर्माण मापदण्ड संशोधन गरेको हो ।
मन्त्रालयले राजपत्रका प्रकाशन गरेको संशोधित मापदण्ड अनुसार अब सहरी क्षेत्रमा जमिनको क्षेत्रफलको तुलनामा साढे ४ गुणा (फ्लोर एरिया रेसियो-फार ४.५) सम्म ठूलो भवन बनाउन पाइनेछ ।
नयाँ मापदण्ड अनुसार काठमाडौं उपत्यकामा व्यापारिक तथा सभा सम्मेलन भवन जमिनको क्षेत्रफलको साढे ३ गुणा (फार ३.५), संस्थागत भवन साढे २ गुणा (फार २.५) आवासीय भवन ४ गुणा (फार ४.०) र मिश्रित आवासीय भवन साढे ४ गुणा (फार ४.५)सम्म अग्लो भवन बनाउन पाइने छ । यसअघि काठमाडौं महानगरपालिकाभित्र योजनाबद्ध आवासीय उपक्षेत्रमा साढे ३ गुणा अग्लो भवन बनाउन पाइने व्यवस्था थियो ।
यस्तै, पहाडमा व्यापारिक तथा सभा सम्मेलन भवनको ३.५, आवासीय भवनले ३.५, मिश्रित आवासीय भवनले ४.० र संस्थागत भवनले २.५ फार कायम गर्नुपर्ने भएको छ ।
यसैगरी, तराईमा व्यापारिक तथा सभा सम्मेलन, आवासीय र मिश्रित आवासीय भवन जग्गाकाे क्षेत्रफलको ३ गुणा (फार ३.०) र संस्थागत भवन साढे २ गुणा (फार २.५ ) अग्लो बनाउन पाइने व्यवस्था गरिएको छ ।
