काठमाडौं । अपर सोलु हाइड्रोको प्राथमिक साधरण सेयर (आइपीओ)मा आवेदन दिने समयवधि थप गरिएको छ ।
कम्पनीले आयोजना प्रभावित स्थानीय सोलुखुम्बु सोलु दूधकुण्ड नगरपालिकाका स्थानीय बासिन्दाका लागि वैशाख २० गतेदेखि विक्रीमा ल्याएको सेयर सबै नबिकेपछि जेठ २० गतेसम्म आवेदन दिने म्याद थपकेको हो ।
कम्पनीले स्थानीयका लागि प्रतिकित्ता १०० रुपैयाँ दरले लाई १३ करोड ५० लाख रुपैयाँ बराबरको १३ लाख ५० हजार कित्ता सेयर विक्रीमा ल्याएको थियो । उक्त आइपीओमा सोलु दूधकुण्ड नगरपालिका (साविकको टाकसेन्दु, बेनी, तामाखानी, सल्लेरी, गार्मा, केरुङ्ग, गोराखानी, टाप्टिङ्ग र तिङ्ला गाविस) स्थानीयले आवेदन दिन पाउने छन् ।
लगानीकर्ताले न्यूनतम १० कित्तादेखि अधिकतम १ लाख कित्तासम्म आवेदन दिन सक्नेछन् । थपिएको अवधिमा पनि सबै सेयर विक्री नभएम बाँकी रहेको सेयर सर्वसाधारणलाई थप गरी निष्काशन गरिने कम्पनीले जनाएको छ ।
स्थानीय बासिन्दाले एनएमबी बैंक, लक्ष्मी बैंक, ग्लोबल आइएमई बैंक र प्राइम कमर्सियल बैंकको सोलुखुम्बु शाखाबाट आवेदन दिन सक्ने कम्पनीले जनाएको छ । साथै, नेपाल धितोपत्र बोर्डबाट सी-आस्वा अनुमति प्राप्त बैंक तथा वित्तीय संस्था र तिनका शाखा कार्यालयबाट आवेदन दिन सक्नेछन् ।
कम्पनीको सेयर निष्काशन तथा विक्री प्रबन्धक एनएमबी क्यापिटल रहेको छ । कम्पनीको आइपीओलाई रेटिङ एजेन्सी इक्रा नेपालले ‘इक्राएनपी इस्यूअर रेटिङ डबल बी प्लस’ रेटिङ दिएको छ । जसले कम्पनीको दायित्व बहन गर्ने क्षमतामा औसत जोखिम रहेको जनाउँछ ।
