काठमाडौं । निजी क्षेत्रको वायुसेवा प्रदायक यती एयरलाइन्सले यात्रापछि पनि यात्रुको १ लाख बीमा अफर ल्याएको छ । एयरलाइन्सले नयाँ वर्ष २०७९ को अवसरमा यात्रुले हवाई यात्रा गरेको ३० दिन पछिसम्म १ लाखको दुर्घटना बीमा पाउने अफर ल्याएको हो ।
कम्पनीले यात्रुलाई यात्रा गर्ने अवधिभर मात्र नभई त्यसपछिको ३० दिनसम्म पनि बीमा सुविधा दिने भएको हो । उक्त सुविधा पाउन यात्रुले यती एयरलाइन्सको मोबाइल एप वा वेबसाइटबाट टिकट काटी यात्रा गरेको हुनुपर्नेछ ।
यात्रुले जति पटक यात्रा गर्यो त्यति नै पटक बीमा सुविधा प्राप्त गर्न सक्ने एयरलाइन्सले जनाएको छ । तर ३० दिन भित्रको अवधिमा दुई पटकभन्दा बढी यात्रा गरेमा यात्रा गरेको सबैभन्दा अन्तिम मिति मान्य हुनेछ र सोही मितिदेखि ३० दिनसम्मको बीमा हुनेछ ।
अघिल्लो यात्रा गर्दा प्राप्त गरेको पोलिसी स्वतः रद्द हुने एयरलाइन्सले जनाएको छ । यो अफर नेपाली नागरिकको हकमा मात्र लागू हुने छ भने तारा एयरलाइन्सका यात्रुका हकमा भने लागू नहुने कम्पनीले जनाइएको छ ।
यो अफर वैशाख १ गतेदेखि ३ महिनाको लागि लागू हुनेछ । बीमा रकम दाबी भुक्तानी सानिमा जनलर इन्स्योरेन्स मार्फत हुनेछ ।