काठमाडौं । धरहरा पुनर्निर्माणको काम सकिन अझै १ वर्ष लाग्ने भएको छ । धरहराको अझै २५ प्रतिशत काम बाँकी रहेकाले सम्पन्न गर्न झण्डै १ वर्ष लाग्ने भएको हो ।
करिब आधा मात्र निर्माण सम्पन्न भएको अवस्थामा तत्कालीन प्रधानमन्त्री खड्गप्रसाद ओलीको हुटहुटी पूरा गर्न गत वैशाख ११ गते धरहराको उद्घाटन गरिएको थियो । उद्घाटन भएको १ वर्ष बित्दासमेत धरहरको पुनर्निर्माण अझै सम्पन्न हुन नसकेको हो ।
धरहरा निर्माण आयोजनाका प्रमुख सञ्जय नकर्मीले धरहरा निर्माणका लागि थप १ वर्ष लाग्ने बताए । ‘धरहरा पुनर्निर्माणको काम अझै २५ प्रतिशत हाराहारीमा बाँकी छ । सो सम्पन्न गर्न झण्डै १ वर्ष लाग्ने देखिन्छ,’ उनले चाणक्य पोष्टसँग भने ।
आयोजना अन्तर्गत हालसम्म करिब ७५ प्रतिशत काम सकिएको छ । धरहराको टावर निर्माण भए पनि अन्य संरचना निर्माण, फिनिसिङ, रंगरोगन, विद्युत जडान तथा अन्य प्राविधिक कामहरु अझै बाँकी रहेको छ ।
धरहराको टावरसँगै बन्दै गरेको तीन तले भूमिगत पार्किङको काम समेत अझै सकिएको छैन । प्रशासनिक भवन, संग्रहालय, सडक मर्मत लगायतका थुप्रै काम अझै बाँकी नै रहेको आयोजनाले जनाएको छ ।
धरहराभित्र बगैंचा बनाउने काम, लाइटिङ, भूकम्पमा भत्किएको पुरानो धरहराको बाँकी भागलाई सिसाभित्र राख्ने जस्ता धेरै काम बाँकी रहेको छ । धरहरा निर्माण भइसकेपनि धरहरा वरिपरी निर्माण गर्न बाँकी रहेको सौन्दर्यकरण तथा मण्डला पोण्ड, वाटर फाउनटेन लगायतका सामग्री निर्माण गर्न बाँकी रहेको हो ।
फेरि म्याद थप्नुपर्ने
धरहरा पुनर्निर्माणका लागि पटकपटक म्याद थपिए पनि अझै काम पूरा हुन सकेको छैन । अन्तिम पटक थपिएको म्याद यही चैत मसान्तमा सकिने भए पनि काम सम्पन्न नहुने भएपछि फेरि म्याद थप्नुपर्ने भएको छ ।
दुई वर्षभित्र निर्माण सम्पन्न गर्ने लक्ष्यसहित प्रधानमन्त्री ओलीले २०७५ पुस १२ गते धरहरा पुनर्निर्माणको शिलान्यास गरेका थिए । तर, कोरोना, कामदार अभाव लगायत कारणले काममा ढिलाइ भएको हो ।
ठेक्का सम्झौता अनुसार काम नभएपछि धरहरा पुनर्र्निर्माण पूरा गर्नका लागि २०७८ पुष १० गतेसम्मका लागि म्याद थपिएको थियो । सो पटक पनि काम नसकिएपछि चैत मसान्तसम्म म्याद थपिएको थियो ।
बाँकी काम सक्न १ वर्ष लाग्ने देखिएपछि फेरि म्याद थप्न प्रक्रिया अघि बढाइएको छ । विगतमा पुनर्निर्माण प्राधिकरणले जिम्मा लिएको धरहरा पुनर्निर्माणको काम हाल शहरी विकास तथा भवन निर्माण विभागलाई सुम्पिएको छ । विभागले म्याद थप्नका लागि मन्त्रालयसमक्ष प्रस्ताव गरेको जनाइएको छ ।
धरहरा पुनर्निर्माण पछि सञ्चालनका लागि काठमाडौं महानगरपालिकालाई जिम्मा लगाइने छ । हालसम्म धरहरा निर्माणका क्रममा २ अर्ब रुपैयाँ हाराहारीमा खर्च भइसकेको छ । धरहरा निर्माण आयोजनाको कुल लागत ३ अर्ब ४८ करोड रुपैयाँ रहेको छ । धरहरा रमण कन्स्ट्रक्शनले पुनर्निर्माण गरिरहेको छ ।
सर्वसाधरणका लागि कहिले खुल्छ ?
धरहरा उद्घाटन गरिएको १ वर्ष बिते पनि अझै सर्वसाधरणका लागि खुला गरिएको छैन । उनले पुनर्निर्माण सम्पन्न हुनु अघि नै सार्वसाधरणलाई खुला गर्ने कि भन्ने बारेमा छलफल भइरहेको बताए । ‘धरहरामा सर्वसाधरण चढ्न मिल्छ कि किल्दैन भनेर छलफलगरिरहेका छौं, तर कुनै निर्णय भएको छैन,’ नकर्मीले भने ।
यता, सहरी विकास मन्त्रालयका प्रवक्ता विष्णुप्रसाद शर्मा हालसम्म धरहरामा चढ्नका लागि कुनै प्रकृया अघि नबढाइएको बताउँछन्बर । उनले धरहरा निर्माण सम्पन्न नभएका कारण यस विषयमा मन्त्रालयले कुनै निर्णय नगरेको बताए ।
उनले उक्त विषयमा काठमाडौं महानगरले आफैं निर्णय अनुसार हस्तान्तरणापछि सञ्चालनको मिति तथा टिकटको मूल्य तोक्ने बताए । ‘अहिलेसम्म धरहरा खुलाउने कुनै कुरा भएको छैन, यो काम महानगरपालिकाको हो, निर्माण पूरा भएपछि उसैले सबै व्यवस्था गर्नेछ,’ शर्माले भने ।
भूकम्पअघि ५ रोपनी क्षेत्रफलमा रहेको धरहरा परिसर अहिले ४२ रोपनीमा फैलिएको छ । धरहरा २२ तलाको र ७२ मिटर अग्लो हुनेछ । नयाँ धरहरामा बगैँचा, संग्राहालय, रङ्गीन जलफोहरा, प्रदर्शनी हल, पार्किङस्थल, पसललगायत रहनेछन् । २२ तले धरहराको तीन तल्लासम्म पार्किङको व्यवस्था हुनेछ । यहाँ सबैले सशुल्क पार्किङको सुविधा पाउनेछन् । पार्किङकमा एक पटकमा चार पाङ्ग्रे गाडी ३४७ वटा र कम्तीमा ७०० मोटरसाइकल अट्नेछन् ।
धरहरा पहिलाकै झै चुनढुङ्गाबाट मौलिक संरचनामा नभइ आधुनिक शैलीमा निर्माण हुन लागेको हो । धरहरा बाहिर हेर्दा जुद्ध शमशेरले बनाएको जस्तो देखिए पनि पहिलेको भन्दा निकै भिन्न र आधुनिक हुनेछ ।
