काठमाडौं । नेपालको दोस्रो अन्तर्राष्ट्रिय विमानस्थल गौतमबुद्ध (भैरहवा) अन्तर्राष्ट्रिय विमानस्थल वैशाख ७ गतेदेखि व्यवसायिक उडानका लागि खुला गरिने भएको छ ।
वैशाख १ गतेदेखि परीक्षण उडान थालिने उक्त विमानस्थलमा ७ गतेदेखि व्यावसायिक उडानका लागि खुला गरिने भएको हो ।नागरिक उड्डयन प्राधिकरणका उपमहानिर्देशक तथा प्रवक्ता देवचन्द्र कर्णले वैशाख ७ बाट विमानस्थल व्यवसायिक उडानका लागि खुल्ला गर्ने बताए ।
‘वैशाख १ मा परीक्षण उडान हुनेछ, वैशाख ७ बाट व्यवसायिक उडानका लागि खुला गरिनेछ, अहिलेसम्म जजिराले मात्र उडान गर्छु भनेर आएको छ, अन्य एयरवेज पनि आउन सक्छन्,’ कर्णले चाणक्य पोष्टसँग भने ।
विमानस्थल व्यवसायिक रुपमा सञ्चालनका लागि खुला गरिएपछि आवश्यक अवस्थामा उडान र अवतरण सम्भव हुने छ । त्रिभुवन विमानस्थलमा विभिन्न कारण अवतरण गर्न नसेकका हवाईजहाजले वैकल्पिक विमानस्थलको खोजीमा बंगलादेशको ढाका वा भारतका विभिन्न विमानस्थलमा जानु पर्ने बाध्यता रहेको छ । वैशाख ७ गतेपछि त्रिभुवन विमानस्थलमा अवतरण गर्न नसकेको हवाइ जहाजहरु गौतमबुद्ध विमानस्थलमा अवतरण गर्न सकिने छ ।
प्राधिकरणले वैशाख १ गते परीक्षण उडान गर्ने तयारी गरेको छ । प्राधिकरणका अनुसार नेपाल एयरलाइन्सको ठूलो जहाजबाट यो विमानस्थलमा परीक्षण गरिने छ । यसअघि एरो थाइको जहाजबाट विमानस्थलमा क्यालिब्रेसन उडान गरिएको थियो । सो परीक्षणले लाइटिङ, सञ्चार उपकरण, रुट बारे विस्तृत प्रकाशन सार्वजनिक गरी विमानस्थल उडानयोग्य भएको देखाएको छ ।
यस्तै २ जेठदेखि कुवेतको जजिरा एयरवेजले दैनिक एक उडान गर्ने भएको छ । उक्त एयरवेजले प्राधिकरणमा हप्ताको ७ दिन उडान गर्न निवेदन दिएको प्रवक्ता कर्णले बताए ।
