काठमाडौं । पोखरामा रहेको हाइ ग्राउण्ड जिपलाइन गर्नेले अन्नपूर्ण केबलकारको टिकट सित्तैमा पाउने भएका छन् । हाइ ग्राउण्ड एडभेन्चर्सले पर्यटक लक्षित गर्दै जिपलाइन गर्नेले केबलकारको टिकट निःशुल्क पाउने योजना ल्याएको हो ।
कम्पनीका अनुसार जिपलाइन बुक गर्ने पर्यटकले केबलकारमार्फत सराङकोट पुगेर जिपलाइन गरी हेम्जा झर्न सक्नेछन् । अमेरिकी ब्रान्ड ‘जिप फ्लायर’को फ्रेन्चाइजी रहेको हाइ ग्राउण्डले सन्चालनमा ल्याएको उक्त जिपलाइन विश्वकै भिरालो र छिटो रहेको कम्पनीको दाबी छ । यस जिपलाइनमा पर्यटकले सुपरम्यान जिपलाइनको समेत अनुभव लिनसक्ने कम्पनीले जनाएको छ ।
कम्पनीका अनुसार जिपलाइनको टप स्टेसन सराङकोटबाट बटम स्टेशन हेम्जासम्म भर्टिकल ड्रप (भिरालो) ६०० मिटर रहेको छ । विश्वकै एक मात्र भिरालो क्षेत्रमा रहेको जिपलाइन भएको जनाउँदै कम्पनीले विश्व किर्तीमानीका लागि दर्ता गर्न आवेदन दिइसकेको जनाएको छ ।
गत शुक्रबार मात्र संचालनमा आएको अन्नपूर्ण केबलकार लेकसाइड सेती बगरबाट सराङकोट पुग्नेछ । यो २.१६ किलोमिटर लामो छ।
यहाँबाट पर्यटकले समुन्द्री सतहबाट १ हजार ६०० मिटर उचाइमा रहेको सराङकोटबाट फराकिलो हिम शृङ्खला, फेवाताल, पोखरा सहरको मनमोहक दृश्यसँगै प्याराग्लाइडिङको उडान नजिकैबाट नियाल्न सक्नेछन्।
