काठमाडौं । राष्ट्रिय गौरवको आयोजना अन्तर्गत निर्माणाधीन पोखरा क्षेत्रीय अन्तर्राष्ट्रिय विमानस्थल निर्माणको अन्तिम चरणमा पुगेको छ । हालसम्म आयोजनाको ९२ प्रतिशत भौतिक प्रगति भएको हो ।
विमानस्थलको मुख्य पूर्वाधाहरु निर्माण भइसकेका छन् भने फिनसिङ, उपकरण जडान लगायत काम बाँकी रहेको छ । हालसम्म रनवे, ट्याक्सी पार्किङ, टर्मिनल भवन, एप्रोन (यात्रु जहाजमा चढ्ने र ओर्लने स्थान), नाला, ह्याङगर निर्माण लगायतका काम सम्पन्न भइसकेका छन् । ती संरचनामा हाल फिनिसिङ र इलेक्ट्रिक जडान कार्य भइरहेको आयोजनाले जनाएको छ ।
आयोजना प्रमुख विनेश मुनकर्मीका अनुसार आयोजना अन्तर्गत थोरै जग्गा अधिग्रहण र फिनिसिङको काम बाँकी रहेको हो । ‘जग्गा अधिग्रहण र फिनिसिङको केही कामहरू बाँकी छ, यो सकिएपछि आयोजना हस्तान्तरण गरिन्छ,’ मुनकर्मीले चाणक्य पोष्टसँग भने ।
आयोजना अन्तर्गत ३ हजार ८९९ रोपनी जग्गा अधिग्रहण गर्नुपर्नेमा कुल ३ हजार ८८० जग्गा अधिग्रहणको काम सम्पन्न भइसकेको छ । २० रोपनी जग्गा अधिग्रहण गर्न बाँकी रहेको उनले बताए । जग्गा अधिग्रहणकै क्रममा आयोजनाले साढे ३ अर्ब रुपैयाँ बढी मुआब्जा वितरण गरिसकेको छ ।
विमानस्थल चीनको सीएएमसी इञ्जिनीयरिङ कम्पनीले निर्माण गरिरहेको छ । चालु आर्थिक वर्षमा आयोजनाका लागि ८ अर्ब ५० करोड रुपैयाँ विनियोजन गरिएको छ । चालु आर्थिक वर्षसम्म १३ अर्ब ४१ करोड २९ लाख रुपैयाँ खर्च भइसकेको छ ।
विमानस्थलको रनवे २ हजार ५०० मिटर लामो रहेको छ भने टर्मिनल भवन १४ हजार स्क्यार मिटरको रहेको छ । ८ हजार स्क्यार मिटर अन्तर्राष्ट्रिय उडानका लागि र ६ हजार स्क्यार मिटर आन्तरिक उडानका प्रयोग हुनेछ । उक्त टर्मिनलको क्षमता वार्षिक ५ लाख जना रहेको छ ।
आयोजना कुल २२ अर्ब रुपैयाँ चिनियाँ ऋण सहयोगमा निर्माण भइरहेको छ । विमानस्थल निर्माण सन् २०२१ जुलाई १० सम्म सक्ने गरी सम्झौता भएको थियो । सन् २०१७ नोभेम्बरदेखि निर्माण सुरू गरिएको विमानस्थल पटकपटक म्याद थप्दा पनि अझै सम्पन्न हुन सकेको छैन । पछिल्लो पटक थपिएको म्याद अनुसार आगामी चैतसम्म काम सम्पन्न गर्नुपर्नेछ ।
अझै फिनसिङ, उपकरण जडान, रिठ्ठेपानी डाँडा कटान, आयल निगमको डिपो निर्माण लगायतका काम बाँकी रहेको छ । पोखरा विमानस्थलको निर्माण पूरा भएपछि बोइङ ७५७ र एयरबस ३२० वा सो सरहका जहाज आवतजावत गर्न सक्नेछन् ।
