काठमाडौं । एनएमबी बैंक र विराटनगरस्थित हाम्रो अस्पताल बीच द्विपक्षीय समझदारी भएको छ । समझदारीपत्रमा एनएमबी बैंकका तर्फबाट प्रदेश १ का प्रमुख उत्सव घिमिरे र अस्पतालका तर्फबाट निर्देशक सुनिलचन्द्र अधिकारीले हस्ताक्षर गरे ।
उक्त समझदारी अनुसार अस्पतालबाट उपलब्ध गराइने विभिन्न किसिमका चिकित्सकीय सेवाहरूमा बैंकका ग्राहकले विशेष छुट तथा सहुलियत पाउने भएका छन् ।
उक्त अस्पतालले बैंकका एटीएम तथा अन्य भिसा कार्ड होल्डर ग्राहकहरू तथा कर्मचारीहरूलाई अन्तरंग (भर्ना), फार्मेसीबाट औषधी खरिद, ल्याब परीक्षणहरू र शल्यक्रियामा छुट उपलब्ध गराउने छ ।
बैंकले आफ्नो सेवा अभिवृद्धि गर्ने क्रममा यस्ता सुविधाहरू ग्राहक माझ प्रस्तुत गर्दै आइरहेको छ । एनएमबी बैंकले हाल देशभरका २०१ शाखा, १३९ एटीएम, ९ एक्सटेन्सन काउन्टरमार्फत उच्चस्तरीय सेवा प्रदान गर्दै आइरहेको छ ।
