काठमाडौं । पछिल्लो समय लगातार ओरालो लागेको सेयर बजारले घट्ने क्रम अझै जारी राखेको छ । दुई दिनमा करिब २१ अंकले घटेको बजारमा आज सामान्य गिरावट आएपनि कारोबार रकम भने ह्वात्तै घटेको छ । यसअघिका दिनमा ३० करोडको हाराहारीमा कारोबार हुँदै आएकोमा आज ७ करोडले घटेर २३ करोडमा सीमित भएको छ ।
बैंक तथा वित्तीय संस्थाहरुले गत वर्षको नाफाबाट आकर्षक लाभांश घोषणा गरिरहेका भएपनि त्यसले लगानीकर्ताको ध्यान तान्न सकेको छैन् । दिनदिनै बजार घट्न थालेपछि लगानीकर्ता थप निराशावादी भएका छन् ।
सेयर बजार मापक सूचक नेप्से २.२४ अंकले घटेर ११६६.६७ अंकमा आइपुगेको छ । आज १७२ कम्पनीको २३ करोड ८९ लाख ५९ हजार ६५३ रुपैयाँको कारोबार भएको छ । ९ लाख ९२ हजार १२२ कित्ता सेयर खरिदबिक्री भएका छन् ।
कारोबार भएका १२ वटा समूहमध्ये ४ समूहको सूचक उकालो लागेका छन् भने बाँकी ८ समूहको सूचक ओरालो लागेका छन् । होटल समूहको सूचक २८.८८अंकले बढेको छ भने जीवन बीमा समूहको सूचक सबैभन्दा धेरै २६.२१ अंकले घटेको छ । वाणिज्य बैंक समूह पनि १.७५ अंकले झरेको छ ।
कारोबार रकमको आधारमा कुमारी बैंकको सेयर शीर्ष स्थानमा रह्यो । यसको १ करोड २५ लाख ९९ हजार ८२९ रुपैयाँको कारोबार भएको छ ।
कारोबारकै आधारमा एनआइसी एशिया बैंक र नेपाल लाइफ इन्सुरेन्सको सेयर क्रमशः दोस्रो र तेस्रोमा रहेका छन् । एनआइसीको १ करोड २३ लाख र नेपाल लाइफको १ करोड ८ लाख रुपैयाँभन्दा बढीको सेयर खरिद–बिक्री भएको छ ।
आज सबैभन्दा धेरै हिमालयन उर्जा विकास कम्पनीको सेयर मूल्य करिब ६.७२ प्रतिशतलेले बढेको छ भने सेन्ट्रल फाइनान्स कम्पनीको सेयर मूल्य सबैभन्दा धेरै ४.४६ प्रतिशतले घटेको छ ।
