काठमाडौं । सिद्धबाबा सुरुङमार्ग निर्माणका लागि चिनियाँ कम्पनीले ठेक्का पाएको छ । उक्त सुरुङमार्ग ‘चाइना स्टेट कन्स्ट्रक्सन इन्जिनियरिङ कम्पनी’ ले ठेक्का पाएको हो ।
चाइना स्टेट कन्स्ट्रक्सनले ७ अर्ब ३४ करोड २१ लाख रुपैयाँ लागतमा उक्त सुरुङमार्ग बनाउने गरी ठेक्का पाएको हो । सुरुङमार्ग निर्माणका लागि ९ कम्पनीले आवेदन दिएका थिए भने प्राविधिक मूल्यांकनबाट ४ कम्पनी छनोट भएका थिए । तीमध्ये चाइना स्टेट कन्स्ट्रक्सन इन्जिनियरिङ सबैभन्दा कम रकम कबोल्दै ठेक्का पाएको हो ।
सुरुङमार्ग निर्माणका लागि १० अर्ब १५ करोड रुपैयाँ लगानी अनुमान गरिएको थियो । सिद्धबाबा सुरुङमार्ग इन्जिनियरिङ, प्रक्योरमेन्ट एन्ड कन्स्ट्रक्सन (ईपीसी) मोडलमा निर्माण गर्न लागिएको हो ।
यसअनुसार सुरुङको डिजाइन पनि कम्पनीले नै तयार गर्नुपर्नेछ । ईपीसी मोडलमा निर्माण गर्दा आयोजनाले दिएको बेसलाइ सर्भेका आधारमा विस्तृत डिजाइन, खरिद, निर्माण र तोकिएको समयसम्म सञ्चालन र मर्मतसम्भार समेत गर्नुपर्छ ।
पाल्पास्थित सिद्धबाबा सुरुङ निर्माणका लागि सडक विभाग अन्तर्गत गुणस्तर अनुसन्धान विकास केन्द्रले जेठ ९ गते ठेक्कामा आवेदन निकालेको थियो । ९ वटा कम्पनीबाट आवेदन आएको भए पनि ४ वटा चिनियाँ कम्पनीहरू मात्र प्राविधिक प्रस्तावमा छनोट भएका थिए ।
चाइना फर्स्ट हाइवे इन्जिनियरिङ कर्पोरेशन लिमिटेड, कोभेक/सीआरइजीसी जेभी, चाइना स्टेट इन्जिनियरिङ कर्पोरेशन लिमिटेड र सीसीइसीसी/सीआरसीसी १४– सियुयान जेभी गरी ४ चिनियाँ कम्पी प्राविधिक प्रस्तावमा छनोट भएका थिए । सोमध्ये चाइना स्टेट कन्स्ट्रक्सन इन्जिनियरिङले हात पारेको हो । कम्पनीले ५ वर्षभित्र उक्त सुरुङ निर्माण गरिसक्नु पर्नेछ ।
यो कम्पनीले यसअघि काठमाडौं–तराई मधेश द्रुतमार्गमा बन्ने सुरुङमार्गको पहिलो प्याकेजको ठेक्का पाएको थियो । त्यस्तै, बुटवल–नारायणगढ सडक विस्तारको काम पनि गरिरहेको छ । यो सडकखण्डको काम निकै सुस्त गतिमा भइरहेको छ ।
सम्झौतापछि काम सुरू हुने
सडक विभागका महानिर्देशक शिवहरी सापकोटाका अनुसार हाल उक्त सुरुङ निर्माण ठेक्का छनोट गरिए पनि सम्झौता भएको छैन । सम्झौता हस्ताक्षर भएपछि मात्र ठेकेदार कम्पनीले फिल्डमा काम सुरू गर्नेछ ।
‘यो अहिले इमम्याच्योर छ, सम्झौता हुनै बाँकी छ, सम्झौतापत्रमा हस्ताक्षर भएपछि उनीहरूको टोली आउनेछन्, अनि मात्र मोबीलाइजेसन हुनेछ,’ सापकोटाले चाणक्य पोष्टसँग भने ।
उक्त सुरुङमार्ग एसियन हाइवे स्ट्याण्डर्डमा १.१२६ किलोमिटर निर्माण हुनेछ । सिद्धार्थ राजमार्गको बुटवल–तानसेन खण्डमा सिद्धबाबाको मन्दिरको उत्तरतर्फ चिडियाखोला नजिकै सुरुङमार्गको एउटा पोर्टल रहनेछ । चिडियाखोलाको खोँच हुँदै दोभान नजिकै निस्कने छ । सुरुङमार्ग भित्र इमर्जेन्सी क्रस प्यासेज, टनेल भेन्टिलेसन,लाइटिङ, मनिटरिङ सिस्टम लगायत हुने बताइएको छ ।
सुरुङमार्गसँगै रक सेट निर्माणको पनि योजना रहेको छ । ’रक सेट’ पैदल यात्रु आवागमनका लागि हुनेछ । उक्त रक सेटमा आकस्मिक अवस्थामा त्यसबाट एम्बुलेन्स जस्ता अत्यावश्यक सवारी साधन चलाउन सकिनेछ । सुरुङमार्गसँगै बाहिर करिब ७८० मिटरको रक सेट बनाउन लागिएको हो ।
