काठमाडौं । नेपाल पानी जहाज संचालनको लागि ४ स्थानमा टर्मिनल (स्टेसन) निर्माणका लागि डिपिआर बनाउने तयारी सुरु भएको छ । देशकै ठूला नदी कोशी, कर्णाली, नारायणी र कालीगण्डकीमा टर्मिनल निर्माण गर्ने योजना सहित पानी जहाज कम्पनीले टर्मिनलको डिपिआर निर्माण गर्न लागेको हो ।
कार्यालयका सुचना अधिकारी राजन प्रधानले ठेक्का आह्वान गरी टर्मिनलको डिपिआर तयार गर्ने काम अन्तिम चरणमा रहेको छ । उनका अनुसार कोशीमा बन्ने टर्मिनलको लागि ८ कम्पनीले आवेदन आएकोमा ५ वटा कम्पनी सर्ट लिष्टमा परेका छन् ।
त्यसैगरी कर्णालीमा ९ वटा आवेदन आएकोमा ५ वटा कम्पनी सर्ट लिष्ट गरिएको छ । दुबै ठेक्काका लागि प्राविधिक मूल्यांकनमा पास भएका कम्पनीहरुसँग (रिक्वेस्ट फर प्रपोजल) आसय–पत्र माग गरिएको छ । कम्पनीहरुले आसय पत्र पेशगरेपछि सोही अनुसार सबैभन्दा कम मूल्यमा डिपिआर बनाउन कबुल गर्ने कम्पनीलाई छनोट गरिने छ ।
कालीगण्डकी नदीको डिपिआर निर्माण ८ वटा कम्पनीले आवेदन दिएकोमा ४ वटा कम्पनी मात्र सर्ट लिष्टमा परेको कार्यालयले जनाएको छ । त्यस्तै, नारायणी नदिमा बन्ने टर्मिनलको डिपिआर निर्माणका लागि ८ वटा कम्पनीले आवेदन दिएका थिए । सुरुमा आवेदन दिएका कम्पनीहरुको प्रकृया नपुगेका कारण कुनै पनि कम्पनी छनोट भएनन् । पुनः खुल्ला गरिएको ठेक्कामा ९ कम्पनीले आवेदन दिएका छन् । यी कम्पनीहरु प्राविधिक मूल्यांकन भइरहेको छ ।
कार्यालयले एउटा नदिमा बनाउने डिपिआरको लागि २५ लाख रुपैयाँ खर्च गर्ने छ । यसरी निर्माण हुने ४ वटा डिपिआरको कुल लागत १ करोड रुपैयाँ रहेको विभागका सुचना अधिकारी प्रधानले जानकारी दिए ।
नेपाल पानीजहाज कार्यालयले कोसी, नारायणी, कालीगण्डकी र कर्णालीमा पानीजहाज सञ्चालन गर्न फिजिविलिटी अध्ययन गरेको थियो । जसको फाइनल रिपोर्ट आउन भने बाँकी रहेको प्रधानले जानकारी दिए ।
अध्ययनको पहिलो ड्राफ्टले ती नदीहरूमा पानीजहाज चलाउन सम्भव रहेको देखाएपछि डिपिआर निर्माण गर्न लागिएको हो ।
नेपालका नदीहरूमा पानीजहाज चलाउने कार्यलाई मूर्तरूप दिन नेपाल पानीजहाज कार्यालय स्थापना भएको ३ वर्ष बितिसकेको छ । २०७५ माघ ३ गतेको मन्त्रिपरिषद् बैठकले पानीजहाज कार्यालय खोल्ने निर्णय गरेको थियो । २०७५ फागुन २ गते कार्यालय उद्घाटन गरी सञ्चालनमा आएको हो ।
