काठमाडौं । मुलुकका ३ ठूला नदीमा पानी जहाज संचालनका लागि अध्ययन गर्न कम्पनी छनोट भएको छ । बबई, राप्ती र सुनकोशी नदीमा पानी जहाज सञ्चालनका लागि फिजिबिलिटी अध्यन गर्न दुई कम्पनी छनोट भएका हुन् ।
नेपाल पानी जहाज कार्यालयका सूचना अधिकारी राजन प्रधानका अनुसार बबई नदीको ५२ किलोमिटर क्षेत्रमा पानी जहाज संचालनको फिजिबिलिटी अध्ययनका लागि बीडीए नेपाल, श्रेष्ठ, ग्रीड जेभी कम्पनी छनोट भएको छ । उक्त नदीमा फिजिबिलिटी अध्ययनका लागि १२ कम्पनीले आवेदन दिएकोमा बीडीए नेपाल, श्रेष्ठ, ग्रीड जेभी छनोट भएको उनले बताए ।
त्यसैगरी, राप्ती नदी र सुनकोशी नदीमा पानी जहाज संचालनको फिजिबिलिटी अध्ययन गर्न रिती, टीएमएस, आइईजे जेभी कम्पनी छनोट भएको छ । सुनकोशीका लागि ८ कम्पनीले आवेदन दिएका थिए भने राप्तीका लागि १३ कम्पनीले आवेदन दिएका थिए । सोमध्ये प्राविधिक र आर्थिक मूल्यांकनबाट दुवै नदीका लागि रिती, टीएमएस, आइईजे जेभी कम्पनी छनोट भएको हो ।
राप्तीको १०२ किलोमिटर र सुनकोशीमा ४६ किलोमिटरमा फिजिबिलिटी अध्ययन गर्न लागिएको सूचना अधिकारी प्रधानले बताए । माघ ५ गते ती कम्पनीहरु छनोट भएको कार्यालयले सूचना जारी गरेको थियो ।
यसै वर्ष अध्ययन सकिने
उनले उक्त कम्पनीले सक्दो चाँडो सम्झौता गरी अध्ययन सुरू गर्नुपर्ने बताए । उनले चालु आर्थिक वर्षभित्रै तीन वटै नदीको फिजिबिलिटी अध्ययन सम्पन्न गर्नेगरी कार्य भइरहेको बताए ।
सार्वजनिक खरिद ऐनमा भएको व्यवस्था अनुसार सूचना सार्वजनिक गरिएको १५ दिनमा सम्झौता गरिसक्नु पर्नेछ । सम्झौता भएको १५ दिनमा कम्पनीहरुले अध्ययन सुरू गर्नुपर्ने छ । कम्पनीले ३ महिना भित्र अध्ययन सकेर फाइनल रिपोर्ट नेपाल पानी जहाज कार्यालयलाई बुझाउनु पर्ने उनले बताए ।
‘फिजिबिलिटी स्टडी यही आर्थिक वर्षभित्र सक्ने गरी गर्ने हो, उनीहरुले ३ महिना जतिको समय पाउने छन्, अब चाँडै अध्ययन सुरू हुनेछ,’ प्रधानले चाणक्य पोष्टसँग भने ।
फिजिबिलिटी अध्ययनका लागि राप्तीको ९९ लाख ३० हजार ३५८ रुपैयाँ, सुनकोशीको ४६ लाख ९ हजार १०७ र बबईको ५० लाख १७ हजार ९०५ रुपैयाँ खर्च लाग्ने कार्यालयले जनाएको छ ।
