काठमाडौं । सरकारले सडक जाम हटाउन काठमाडौं उपत्यकामा वटा फ्लाइओभर निर्माण प्रक्रिया अघि बढाएको छ । सडक विभाग अन्तर्गतको गुणस्तर अनुसन्धान विकास केन्द्रका अनुसार काठमाडौंमा एक र ललितपुरमा तीन वटा गरी ४ वटा फ्लाइओभरको काम अघि बढेको हो ।
केन्द्रका सिनियर इन्जिनीयर सौरभ बज्रचार्यका अनुसार हाल ललितपुरको ग्वार्को, एकान्तकुना, सातदोबाटो र काठमाडौंको बलम्बुमा फ्लाइओभर निर्माण अघि बढेको हो । बलम्बु र ग्वार्कोको निर्माण प्रक्रियामा गइसकेको छ भने एकान्तकुना र सातदोबाटोको डिजाइन भइरहेको केन्द्रले जनाएको छ ।
ग्वार्को फ्लाइओभरको ठेक्का अन्तिम चरणमा
ललितपुर ग्वार्कोमा बन्ने फ्लाइओभर (ग्रेड सेपरेटेड इन्टरसेक्सन) निर्माणको ठेक्का प्रकृया अन्तिम चरणमा पुगेको छ । फ्लाइओभर निर्माणका लागि बोलपत्र आह्वान भई प्राविधिक मूल्यांकन समेत भई आर्थिक मूल्यांकनको क्रममा रहेको छ ।
सडक विभाग मातहतको गुणस्तर अनुसन्धान विकास केन्द्रले गत असार २८ गते ठेक्का आह्वान गरेको थियो । सो आह्वानमा ९ वटा कम्पनीले आवेदन दिएक थिए । सोमध्ये ८ वटा कम्पनी प्राविधिक मूल्यांकनमार्फत छनोट भएको छन् । हाल ती कम्पनीको आर्थिक प्रस्ताव बारे अध्ययन भइरहेको केन्द्रले जनाएको छ ।
प्राविधिक मूल्यांकनबाट एमआर भीम–सगरमाथा जेभी, शर्मा एण्ड कम्पनी, लामा–गोल्डेन गुड जेभी, सूर्य–भ्याली/विकास–ब्रदर्स जेभी, एलिट कन्स्ट्रक्सन, अनक–श्रेष्ठ जेभी, तुन्दी–रसुवा–रोशन जेभी, कालिका कन्स्ट्रक्सन, आशिष–समानान्तर जेभी र एलिट कन्स्ट्रक्सन गरी ८ वटा कम्पनी पास भएका छन् ।
केन्द्रका सिनियर इन्जिनीयर बज्रचार्यका अनुसार अब दुई महिनाभित्र ठेक्का लगाइसकिने छ । ‘हाल प्राविधिक मूल्यांक्नबाट छनोट भएका कम्पनीहरुको वित्तीय प्रस्ताव अध्ययन भइरहेको छ । सम्भवतः अबको एक हप्ता भित्र उक्त प्रस्ताव खोलिने छ । सबैभन्दा कम मूल्य राख्ने कम्पनीले ठेक्का पाउँछ,’ उनले चाणक्य पोष्टसँग भने ।
फ्लाइओभर इन्जिनीयरिङ प्रोक्युरमेन्ट कन्स्ट्रक्सन (ईपीसी) मोडलमा निर्माण गर्ने गरी ठेक्का निकालिएको छ । काम सुरू गरेको २ वर्षमा आयोजना सक्ने लक्ष्य रहेको छ । जसमा ४ महिना डिजाइन र २० महिना निर्माण अवधि तोकिएको छ ।
४५५ मिटर लम्बाइ हुने गरी फ्लाइओभर चक्रपथको बीचमा रहेको ४ लेनमा समानान्तर भएर निर्माण हुनेछ । फ्लाइओभर निर्माण गर्न करिब २४ करोड रुपैयाँ लागत अनुमान गरिएको छ ।
बलम्बु फ्लाइओभरको जग्गा अधिग्रहण सुरू
नागढुंगा–नौबिसे सुरूङमार्ग आयोजना अन्तर्गत बलम्बुमा फ्लाइओभर निर्माण अघि बढेको छ । मुआब्जा वितरण निश्चत भएसँगै फ्लाइओभर निर्माणले गति लिन लागेको हो ।
फ्लाइओभर बन्ने क्षेत्रमा पर्ने जग्गा अधिग्रहणका लागि आयोजनाले अर्को साताबाट मुआब्जा वितरण सुरू गर्ने प्रमुख नरेशमान शाक्यले बताए । उनका अनुसार हालसम्म मुआब्जा लिनका लागि १०० बढी व्यक्तिले आवेदन हालेका छन् । आयोजना निर्माण स्थलमा करिब ५५ वटा बढी घरटहरा रहेको आयोजना प्रमुख शाक्यले बताए । सडक छेउमा परेका जमिनका लागि आनाको ५० देखि ५२ लाख रुपैयाँ मुआब्जा वितरण गरिने उनले बताए ।
‘७० प्रतिशतले मुआब्जा लिनका लागि आवेदन हालिसकेका छन्, लालपुर्जा हाम्रो नाममा आउना साथ मुआब्जा दिनेछौं, सायद अर्को हप्ताबाट मुआब्जा पनि वितरण सुरू हुन्छ,’ शाक्यले चाणक्य पोष्टसँग भने ।
मुआब्जा वितरणका लागि हालै ३० करोड रुपैयाँ रकमान्तर गरिएको छ । आयोजनाको क्षेत्रमा पर्ने १२ रोपनी जग्गा अधिग्रहण गर्नुपर्ने छ । आयोजनाको मुआब्जाका लागि १ अर्ब १४ करोड रुपैयाँ लाग्नेछ ।
८ महिना भित्र फ्लाइओभर निर्माण सम्पन्न गर्नेगरी काम सुरू गरिसकेको प्रमुख शाक्यले बताए । उनका अनुसार हाल फ्लाइओभर निर्माणका लागि जग खन्ने काम सुरू गरिसकेको छ । दुई लेनको फ्लाइओभर १२८ मिटर लामो हुने छ । एउटा लेन ३.५ मिटरको हुनेछ ।नागढुंगा–नौबिसे सुरूङमार्गको मुख्य ठेकेदार कम्पनी हाज्मा–आन्दो कर्पोरेशन लिमिटेडले नै बलम्बुको फ्लाइओभर निर्माण गर्नेछ ।
सातदोबाटो र एकान्तकुनाको डिजाइन अन्तिम चरणमा
ललितपुरको सातदोबाटो र एकान्तकुनामा फ्लाइओभर बनाउन अन्तिम डिजाइन (फाइनल डिजाइन)को काम भइरहेको छ । ४ लेनको बन्ने यी फ्लाइओभरको अन्तिम डिजाइन पूरा भएलगत्तै सो फ्लाइओभरहरुको समेत ठेक्का आह्वान गरिने केन्द्रले जनाएको छ ।
