काठमाडौं । चक्रपथ विस्तार आयोजना अन्तर्गत दोस्रो खण्ड (कंलकी–वसुन्धरा) को विस्तारका लागि ‘साइट क्लियरेन्स’को काम लगभग सकिसकेको छ । कलंकीदेखि वसुन्धरा सडकमा किनाराका रुख कटान, बिजुलीको खम्बा, अस्थायी टहरा हटाउने लगायत काम सकिएको हो ।
आयोजना प्रमुख कुवेर नेपालीले साइट क्लियरेन्सको काम लगभग (९९.९ प्रतिशत) सकिएको बताए । उनले अबको समयमा साइट क्लियरेन्सलाई लिएर दोस्रो खण्डमा कुनै समस्या नआउने स्पष्ट पारे ।
‘कलंकीदेखि बसुन्धराको खण्डमा हामीले साइट क्लियरेन्सको काम लगभग सकिसकेका छाैं, त्यसमा अहिले चिनियाँ टोलीले अवलोकन गरिरहेका छन्,’ नेपालले चाणक्य पोष्टसँग भने ।
उक्त खण्डमा पोलहरू हटाउन समय लागेको उनको भनाइ छ । एकैपटक पोल हटाउँदा लाइन जाने र समुदायमा असहज हुने भएकाले एक/एक वटा गरेर गर्नुपर्दा केही ढिला भएको उनले बताए ।
विगतमा दोस्रो खण्ड अन्तर्गत कलंकीदेखि–धोबीखोला (गोपीकृष्ण हलनजिकको पुल) सम्मको ११.६ किलोमिटर सडकलाई दोस्रो खण्डमा राखिएको थियो । हाल घटाएर कलंकीदेखि वसुन्धराको ८.६ किलोमिटर खण्डलाई दोस्रो खण्डमा राखिएको छ ।
चीन सरकारको अनुदान सहयोगमा विस्तार हुन लागेको सो आयोजना अन्तर्गत साइट क्लियरेन्समा समस्या आएपछि विगतमा डिजाइनको काम सुरू हुन सकेको थिएन ।
चक्रपथ विस्तार आयोजना अन्तर्गत स्वयम्भूमा चैत्य भत्काउन समस्या भएको छ । सो खण्डमा पर्ने १९ घर भत्काइएको छैन । यस्तै विगतको योजना अन्तर्गत महाराजगञ्जमा पर्ने घरले समेत निर्माणमा समस्या ल्याएको थियो । दोस्रो खण्डमा महाराजगञ्जमा विस्तार नगरिने भएको छ ।
रूख कटान भएको लामो समयसम्म पनि विस्तारको काम अघि नबढेको हो । मझदारीपत्र (एमओयू) मा शतप्रतिशत साइट क्लियर हुनुपर्ने उल्लेख रहेकाले चिनियाँ पक्ष त्यसकै पर्खाइमा थिए । त्यसमाथि चक्रपथ पहिलो खण्डको सडक विस्तारका क्रममा संरचना नहटाई काम थाल्दा ढिलासुस्ती भएपछि यस पटक चिनियाँ कम्पनीले यस्तो अडान लिएको देखिन्छ ।
डिजाइनका लागि चिनियाँ टोली स्थलगत अवलोकनमा
नेपाली पक्षले साइट क्लियरेन्स गरेसँगै चिनियाँ टोली स्थलगत अवलोकनका लागि नेपाल आएको छ । चिनियाँ टोलीले स्थलगत अध्ययन/अवलोकनपछि सडकको डिजाइन बनाउने छ ।
‘टोली साइट हेर्न आएका छन्, यो हेरेर केही परिवर्तन गर्नुपरे समय लाग्छ नत्र, अब केही हप्तामा उनीहरू फर्केपछि डिजाइन बनाउने काम चीनमै सुरू गर्छन्,’ नेपालले भने ‘डिजाइन बन्न ३/४ महिना लाग्न सक्छ, ठ्याक्कै कहिलेसम्म सकिन्छ भन्ने एकीन छैन ।’
डिजाइन पूरा भएपछि चिनियाँ टोली आफैंले साइटमा मोबिलाइजेसन गरी काम सुरू गर्ने छन् । सडक विस्तारको प्रारम्भिक डिजाइनको काम भने भइसकेको छ । अन्तिम (फाइनल) डिजाइन गरेपछि मात्र चिनियाँँ टोलीले साइटमा काम सुरू गर्नेछ ।
महाराजगञ्जदेखि धोवीखोला पुलसम्मको साइट क्लियर नभएकाले त्यसलाई छोडेर बाँकी खण्ड (८ किमि) कलंकी–वसुन्धराको विस्तार थाल्न चिनियाँ टोली नेपाल आएको हो । यसअघि चीन सरकारकै सहयोगमा चक्रपथ पहिलो खण्ड (कोटेश्वर-कलंकी सडक) ८ लेनमा विस्तार भइसकेको छ । जसको दूरी १०.३९ किमि छ ।
