काठमाडौं । नेपालमा रोजगारीको अवसर नपाएर दैनिक हजारौं युवा विदेशी भूमिमा पसिना बगाउन जान्छन् । स्वदेशमा अवसर नपाएर भनौ या साना तिना काम गर्न अल्छि मानेर विदेश भासिन बाध्य छन् युवाहरु ।
नेपाली युवावर्ग पैसा कमाउन विदेशनै जानुपर्छ भन्ने मानसिकताले ग्रस्त छन् । अनि कोरिया,जापान, अमेरिका वा कुनै खाडी मुलुक नगइ स्वदेशमै पनि राम्रो आम्दानी गर्न सकिन्छभन्दा उनीहरुलाई पत्यार लाग्दैन । विदेशमा बसेर मासिक ४० हजारदेखि डेढ लाख रुपैयाँसम्म आम्दानी गर्ने नेपाली युवालाई स्वदेशमै महिनाको लाख कमाउन सकिन्छ भन्ने कुरा अनौठो लाग्न सक्छ ।
तर, काम गर्यो भने नेपालमा पनि पैसा कमाउन सकिन्छ भन्ने उदाहरण बनेका छन् सरोज श्रेष्ठ । उनले चाबहिलको स्तुपा अगाडि आलु परौठा बेचेर मासिक ३ लाख रुपैयाँ आम्दानी गर्दै आएका छन् ।
कक्षा १२ को पढाइ सकेर वैदेशिक रोजगारका लागि मलेसिया पुगेका उनले काम गर्ने क्रममा आफ्नो हातको औँला गुमाए । त्यसपछि नेपाल फर्केका उनले बुबाको देहान्त पछि आमाले गर्दै आएको पेशा सम्हाले ।
उनकी आमा सिता श्रेष्ठले चाबहिल स्तुपा अगाडि ठेलामा आलु परौठा बेच्दै आएकी थिइन् । उनको आमाले आलु परौठा बेच्न थालेको ३ वर्ष भइसकेको छ ।
आमाले २० हजार लगानीमा पाटनरसिपमा सुरु गरेको परौठा व्यापारमा आमा मात्र बढी खटिनु पर्ने भएपछि श्रेष्ठले आफैं आमाको सहयोगीको रुपमा काम सुरु गरेका थिए ।
आमालाई सघाउने क्रममा ठेला महानगरले उठाएर लगेपछि उनले पसल लिए । ६ हजार भाडा तिर्ने गरी २ लाखमा किनेको सानो पसलको भाडा समेत १ वर्ष नपुग्दै साउले फेरि बढाए ।
फस्टाउदै गएको व्यापार मिठो परौठाको स्वादसँगै आजभोलि आमाले भन्दा श्रेष्ठ आफैं बढी परौठा बनाउने गर्छन् । आमा छोरा दुबै मिलेर दैनिक परौठा बनाउने क्रममा खर्च पनि उत्तिनै बढ्दो रहेको छ । दैनिक ८/१० हजार रुपैयाँको व्यापार गर्ने उनले मासिक ३ लाखको हाराहारीमा आम्दानी गर्छन् ।
आम्दानीको आदि रकम पसल संचालनमै खर्च हुने भए पनि अरु बचेको रकमबाट बचत पनि गर्दै आएका छन् । ‘पसल सानो छ मान्छे अट्दैनन्, बाटोमै बसेर खानुहुन्छ,’ श्रेष्ठले भने ।
चाबहिलमै भाडामा बस्ने गरेका आमा छोराले पसलको भाडा मात्र ८ हजार रुपैयाँ तिर्नु पर्छ । यसो भए पनि पछि गएर अलि ठूलो पसल लिएर व्यापार गर्ने योजनामा श्रेष्ठ रहेका छन् ।
परौठा खान कलेज बंक गरेर आउँछन्
पसल नजिकै पशुपती स्कुल र कलेज समेत रहेकोले पराठा व्यापार निकै फस्टाएको देखिन्छ । आलु परौठा माथि अण्डा, चाउचाउ, अचार, हालेर स्वाद अनुसारको बनाइने भएकाले विद्यार्थीहरुले मिठो मानि खाने गरेको पाइन्छ । एउटा रोल खाएपछि भोकनै मर्ने आलु परौठा खान कतिपय विद्यार्थीले स्कुल तथा कलेज समेत बंक गरेर आउने गरेको समेत पाइयो ।
बिहान ६ बजेदेखि सञ्चालन हुने सो पसलमा कहिले फुर्सदमा नहुने श्रेष्ठ शनिबार भने व्यापार कम हुने भएकाले फुर्सदमै हुन्छन् । उनले राती ९ बजेसम्म पसल खुल्ला गर्ने गरेका छन् । पसलमा डेढ वर्षदेखि परौठा व्यापार गर्दै आएका श्रेष्ठ ग्राहक धेरै हुँदा प्रायः आफू पनि परौठा खाएरै काम गर्ने गर्छन् ।
परौठा बनाउने क्रममा दैनिक ५ देखि ६ क्रेट अण्डा सकिने गरेको छ । चाउचाउ २ काटुनसम्म सकिने उनी बताउँछन् । दैनिक ३ लिटरसम्म तेल, ३ कुकर आलु, १० केजी भन्दा बढि पिठो पराठा बनाउनमा प्रयोग हुने गर्छ । प्रत्येक हप्ता ग्यास सकिने गरेको छ ।
घरमै आलु, अचार र पिठो तयार गरेर ल्याउने गरेको श्रेष्ठकी आमाले भने आफ्नो छोराले सघाउन थाले पछि आफूमा झन काम गर्ने हिम्मत बढेको बताउने गरेकी छन् ।
आफ्नो सानो व्यवसायबाटै घरखर्च देखि पसलको खर्च समेत धानेका यी आमा छोराले नेपालमै गर्र्यो भने कमाउन विदेश गइराख्नु पर्दैन भन्ने गतिलो उदाहरण बनेका छन् ।
सस्तो मूल्यमा मिठो खाजा
यस पसलमा श्रेष्ठले आलु परौठा, अण्डा परौठा, परौठा चाउचाउ रोल, अण्डा चाउचाउ पराठा रोल, बारा, अण्डा बारा, स्पेसल रोल, चिया लगायतका सामग्री विक्री गर्ने गरेका छन् ।
पसलमा न्यूनतम २० रुपैयाँको आलु परौठादेखि १ सय ३० रुपैयाँ पर्ने स्पेसल रोल समेत विक्री हुने गरेको पाइन्छ । यस्तै, श्रेष्ठले चाबहिल वरिपरीको ठाउँमा परौठा डेलीभरी गर्ने समेत गरेका छन् ।
थोरै मूल्यमा मिठो खाजाको रुपमा प्रयोग गर्न सकिने आलु परौठा रोल स्वाद र त्यसमा हालिने परिकार अनुसार मूल्य राखिएको छ ।
सादा आलु परौठाको २० रुपैयाँ, अण्डा आलु परौठाको ४० रुपैयाँ, चाउचाउ, अण्डा आलु परौठाको ५० रुपैयाँ रहेको छ । यसरी २० रुपैयाँदेखि ५० रुपैयाँसम्मको आलु परौठाको रोलले प्रत्येक ग्राहकको भोक मार्दैछन् श्रेष्ठ ।
