काठमाडौं। दोस्रो बजारमा सबैभन्दा महँगो सेयर मूल्य भएको उत्पादनमूलक कम्पनी युनिलिभर नेपालले गत आर्थिक वर्षको नाफाबाट ७७०% लाभांश दिने घोषणा गरेको छ ।
कम्पनीको बिहीबार बसेको सञ्चालक समिति बैठकले गत वर्षको भन्दा १० प्रतिशत बढी अर्थात प्रतीकित्ता ७७० रुपैयाँ नगद लाभांश दिने निर्णय गरेको हो ।
कम्पनीले गत वर्ष ७०० रुपैयाँ नगद लाभांश घोषणा गरेको थियो। यो लाभांश प्रस्ताव आगामी वार्षिक साधारण सभाबाट पारित भएपछि वितरण हुनेछ ।
गत वर्ष कम्पनीले १ अर्ब ६ करोड रुपैयाँ नाफा गरेको थियो। अघिल्लो वर्ष नाफा ९९ करोड ९४ लाख रुपैयाँ नाफा गरेको थियो। कम्पनीको चुक्ता पूँजी ९ करोड २१ लाख रुपैयाँ रहेको छ। कम्पनीको जगेडा कोषमा एक अर्ब ८१ करोड रुपैयाँ जम्मा भएको छ।
युनिलिभर नेपाल स्टक एक्सचेन्जमा सूचीकृत कम्पनीमध्येमा सबैभन्दा धेरै प्रतिसेयर आम्दानीकोभएको कम्पनी हो । यसको प्रतिसेयर आम्दानी ११५८ रुपैयाँ छ। यसको प्रतिसेयर नेटवर्थ २ हजार ५२६ रुपैयाँ छ ।
