काठमाडौं । सेयर बजारमा भीषण पहिरो गएको छ । खुलेदेखि निरन्तर ओरालो लागेको बजार ८८ अंकले घटेको हो ।
नेपाल राष्ट्र बैंकले मौद्रिक नीतिमार्फत सेयर धितो कर्जाकामा कडाइ गरे यता ओरालो लागेको बजार अझै लयमा फर्किएको छैन । पछिल्लो समय बैंकिङ प्रणालीमा भएको तरलता अभावले पनि बजारलाई प्रभाव पारेको देखिन्छ । पछिल्लो ४ महिनामा मात्रै नेप्से ८०० बढी अंकले घटेको छ ।
आइतबार सेयर बजार मापक सूचक नेप्से ८८.७० अंकले घटेर २३६१.१७ विन्दुमा आइपुगेको छ । आज २२८ कम्पनीको ३ अर्ब ३८ करोड २५ लाख ९ हजार ५२० रुपैयाँ बराबरको ७४ लाख ६० हजार ८७४ कित्ता सेयर किनबेच भएका छन् ।
आज कारोबारमा आएका १३ वटै समूहको परिसूचक राताम्मे भएको छ । व्यापार समूह सबैभन्दा धेरै ७.४५ प्रतिशतले घटेको छ । त्यस्तै, विकास बैंक समूह ६.४५ प्रतिशतले घटेको छ ।
आज मञ्जुश्री फाइनान्सको सर्वाधिक कारोबार भएको छ । यसको ३१ करोड रुपैयाँको कारोबार भएको छ । यस्तै, नेशनल हाइड्रोपावरको १३ करोड र नबिल बैंकको ११ करोडको कारोबार हुँदै सर्वाधिक कारोबार हुने कम्पनीको शीर्ष तीनमा रहे ।
उच्च अंकले घटेको बजारमा आज दुई कम्पनीको सेयर मूल्यमा नेगेटिभ सर्किट लागेको छ । नयाँ सारथी लघुवित्तको सेयर मूल्य ठ्याक्कै १० प्रतिशतले घटेको छ भने लक्ष्मी इक्वीटी फण्डको करिब १० प्रतिशतले घटेको छ ।
त्यसैगरी, नेशनल हाइड्रो डेभलपर ९.०५, जोशी हाइड्रो ८.९६, एनआरएन इन्फ्रास्ट्रक्चर ७.१९, सिन्धु विकास, एक्सेल डेभलपमेन्ट, बोटलर्स नेपालको सेयर मूल्य ६ प्रतिशतभन्दा धेरैले घटेको छ । त्यस्तै, विशाल बजार वरुण हाइड्रोपावर, एनएमबी, मेरा माइक्रोफाइनान्स लगायत १ दर्जन कम्पनीको मूल्य ५ प्रतिशतबढीले घटेको छ ।
घट्दो बजारमा आज मञ्जुश्री फाइनान्सका सेयरधनीले भने सबैभन्दा धेरै ४.५५ प्रतिशत कमाएका छन् ।
