काठमाडौं । बीमा समितिले स्वदेशी पुनर्बीमा कम्पनीको व्यवसाय विस्तारमा सहयोग पुग्ने गरी निर्देशन जारी गरेको छ ।
समितिले इजाजत प्राप्त जीवन तथा निर्जीवन बीमा कम्पनीहरुलाई सर्कुलर जारी गर्दै शतप्रतिशत पुनर्बीमा स्वदेशी पुर्नबीमा कम्पनीमा गर्न निर्देशन दिएको हो ।
यस अनुसार अब सबै बीमा कम्पनीहरुले नेपाली पुनर्बीमा कम्पनीमै पुनर्बीमा गर्नुपर्नेछ । यद्यपि,नेपाली पुनर्बीमा कम्पनीहरुले अस्वीकार गरेको अवस्थामा भने विदेशी पुनर्बीमा कम्पनीहरुलाई व्यवसाय दिन पाउनेछन् ।
हाल बीमा कम्पनीहरुले कम्तीमा २० प्रतिशत व्यवसाय नेपाली पुनर्बीमा कम्पनीमा गर्नुपर्ने व्यवस्था छ । हाल नेपालमा सरकारी स्वामित्वको एउटा र निजी क्षेत्रको एउटा गरी दुई वटा पुनर्बीम कम्पनी संचालनमा रहेका छन् ।
सरकारी स्वामित्वको नेपाल पुनर्बीमा र निजी क्षेत्रको स्वामित्वको हिमालयन रि सञ्चालनमा छन् । निजी क्षेत्रको हिमालयन रि भने हालै मात्र संचालनमा आएको हो ।
