काठमाडौं । निजी क्षेत्रको आन्तरिक वायुसेवा प्रदायक कम्पनी गुण एयरलाइन्सले पोखरा–भरतपुर नियमित उडान सुरु गरेको छ ।
एयरलाइन्सले आन्तरिक पर्यटनलाई टेवा पुर्याउने उद्देश्यका साथ सो रुटमा नियमित उडान सुरु गरेको हो । उडान पोखरा र भरतपुर जोड्ने पुलका रुपमा हुने हुँदा यात्रुलाई सहज पुग्ने अपेक्षा एयरलाइन्सको छ ।
उडानको पहिलो दिनमै यात्रुहरूबाट साथ पाएकाले थप हौसला मिलेको एयरलाइन्सका प्रवक्ता एवम बजार प्रमुख प्रज्वल थापाले बताए ।
उनका अनुसार गुणले भोलिदेखि पोखरा–भैरहवा र शुक्रबारदेखि पोखरा–नेपालगन्ज अन्तर प्रदेश उडान समेत दैनिक रुपमा भर्ने भएको छ । यसबाट आन्तरिक पर्यटन प्रबद्र्धनलाई ठूलो मद्दत पुग्ने कम्पनीको विश्वास छ ।
यात्रुहरूलाई सुरक्षित र भरपर्दो हवाई सेवा सुविधा दिन कुनै कसर बाँकी नराख्ने र गुणस्तरीय हवाई सेवा दिन त्यसै अनुसार उडानहरू थप गर्दै आन्तरिक हवाई बजारमा आफूहरू पनि उच्च स्तरको सेवा दिँदै उडान गरिरहेको थापाले बताए ।
