काठमाडौं । लगातार ओरालो लागेको सेयर बजारमा पहिरो जाने क्रम अझै रोकिएको छैन । गतहप्ता १७ अंकले घटेको बजार यो साताको दुई दिनमै २६ अंकले घटेको छ । आइतबार ११.६३ अंकले घटेको बजार सामेबार पनि दोहोरो अंकले नै घटेको छ । आज सूचकमा गिरावट आएपनि कारोबारमा भने ११ करोडले बढोत्तरी आएको छ ।
सूचीकृत कम्पनीहरुले गतवर्षको नाफाबाट आकर्षक लाभांश घोषणा गरेपनि लगानीकर्तालाई त्यसले तान्न सकेको देखिदैन । बजारले गति लिनुपर्ने समयमा पनि लय समात्न नसक्दा लगानीकर्ता झन निराशावादी बन्दै गएका छन् ।
सेयर बजार मापक सूचक नेप्से १४.४५अंकले घटेर ११७०.३४ विन्दुमा आइपुगेको छ । आज १७१ कम्पनीको ४० करोड ७५ लाख ६९ हजार ७१२ रुपैयाँको कारोबार भएको छ । १३ लाख ८० हजार ६६० कित्ता सेयर खरिदबिक्री भएका छन् ।
कारोबार भएका ११ वटै समूहका सूचक ओरालो लागेका छन् । आज जीवन बीमा समूहको सूचक सबैभन्दा धेरै ९५.६८अंकले घटेको छ भने निर्जीवन बीमा समूहको सूचक ७१.२७ अंकले घटेको छ । वाणिज्य बैंक समूह पनि १२.५९अंकले झरेको छ ।
कारोबार रकमको आधारमा नेपाल बैंकको सेयर शीर्ष स्थानमा रह्यो । यसको २ करोड ५६ लाख ६५ हजार ८२ रुपैयाँको कारोबार भएको छ ।
कारोबारकै आधारमा नेपाल लाइफ इन्सुरेन्स र यूनाइटेड फाइनान्स क्रमशः दोस्रो र तेस्रोमा रहेका छन् । नेपाल लाइफको २ करोड ५० लाख र यूनाइटेडको २ करोड ४४ लाख रुपैयाँ भन्दा बढीको सेयर खरिद–बिक्री भएको छ ।
आज सबैभन्दा धेरै दिव्यश्वरी हाइड्रोपावरको सेयर मूल्य करिब ५.४५प्रतिशतले बढेको छ भने ग्रामिण विकास लघुवित्तको सेयर मूल्य सबैभन्दा धेरै ७.९६ प्रतिशतले घटेको छ ।
