काठमाडौं । सेयर बजार पहिरो गएको छ । सोमबार १९ अंकले घटेको बजार आज करिब ८० अंकले घटेको हो । पछिल्ला दुई दिनमा मात्रै नेप्से ९७ अंकले घटेको छ ।
बैंकिङ प्रणालीमा भएको तरलता अभावका कारण अझै ब्याजदर बढ्ने हल्लाले नेप्सेमा आज भारी गिरावट आएको आकलन गरिएको छ ।
सूचकमा भारी गिरावट आए पनि कारोबार रकममा भने बढोत्तरी आएको छ । अघिल्लो दिनको तुलनामा आज कारोबार रकम २ अर्बले बढेर साढे ६ अर्ब पुगेको छ ।
सेयर बजार मापक सूचक नेप्से ७९.७९ अंकले घटेर २७४९.८५ विन्दुमा आइपुगेको छ । यसदिन २२५ कम्पनीको ६ अर्ब ५२ करोड ७७ लाख २९ हजार ५४७ रुपैयाँ बढीको १ करोड १९ लाख १७ हजार ७७ कित्ता सेयर किनबेच भएका छन् ।
आज कारोबारमा आएका १३ वटै समूहको परिसूचकमा राताम्मे भएको छ । फाइनान्स समूह सबैभन्दा धेरै ५.२९ प्रतिशतले घटेको छ । यस्तै, विकास बैंक समूह ५.२३, अन्य समूह ४.१२, निर्जीवन बीमा समूह ३.५८ प्रतिशतले घटेको छ ।
कारोबारमा आएका २२५ कम्पनीमध्ये जम्मा १२ कम्पनीको सेयर मूल्य बढेको छ भने २०८ कम्पनीको मूल्य घटेको छ । ५ कम्पनीको मूल्य स्थिर रहेको छ ।
आज नबिल बैंकको सर्वाधिक कारोबार भएको छ । यसको झन्डै ३० करोड रुपैयाँको कारोबार भएको छ । यस्तै, साहस ऊर्जाको साढे २५ करोड र अपी पावरको २२ करोड बढीको कारोबार हुँदै सर्वाधिक कारोबार हुने कम्पनीको शीर्ष तीनमा रहे ।
उच्च अंकले घटेको बजारमा पनि आज ३ कम्पनीको सेयर मूल्यमा पोजेटिभ ३० सर्किट लागेको छ । साहस ऊर्जा, मानुषी लघुवित्त र तेह्रथुम पावर कम्पनीको सेयर मूल्य करिब १० प्रतिशतले बढेको छ ।
घट्दो बजारमा आज दुई कम्पनीको सेयर मूल्यमा नेगेटिभ सर्किट लागेको छ । आइसीएफसी फाइनानन्स र महालक्ष्मी विकास बैंकको सेयर मूल्य ठ्याक्कै १० प्रतिशतले घटेको छ ।
यसैगरी, मिथिला लघुवित्त ७.४२ प्रतिशत, गुडविल फाइनान्स, सामुदायिक लघुवित्त, युनिभर्सल पावर, रुरु जलविद्युत्, घलेक्दी, कालिका पावर, रिलायन्स फाइनान्स, कर्पोरेट डेभलपमेन्ट बैंकर सीइडीबी हाइड्रोपावरको मूल्य ६ प्रतिशतभन्दा धेरैले घटेको छ ।
