काठमाडौं । काठमाडौंको गौरीघाटमा छठको लागि तयारी पूरा भएको छ । प्रकृति प्रति कृतज्ञता र आराध्यदेव सूर्यको उपासना गरी मनाइने छठ पर्वको तयारी पूरा भएको गौरीघाट समितिले जानकारी दिएको हो ।
छठका लागि जाग्रम बस्ने ठाउँ, घुम्ती शौचालय, सुरक्षा, पाल, ओछ्याउना, कार्पेट, मुढा बाल्ने र स्वास्थ्य सेवा तथा एम्बुलेन्स सेवा, लगायत आवश्यक सम्पूर्ण तयारी पूरा भएको समितिले जनाएको छ ।
‘छठको लागि हामीले सम्पुर्ण तयारी पूरा गरेका छौं, घाट लिन आउनेहरुको क्रम जारी छ,’ चाणक्य पोष्टसँग गौरीघाट छठ समितीका सदस्य अनिल सिंहले भने ।
सिंहका अनुसार यो वर्ष गौरीघाटमा ६७० सिट उपलब्ध गरिएको छ । एक (एक मिटर) घाटको लागि ११ सय रुपैयाँ तिर्नपर्ने छ ।
‘गतवर्षदेखी नै कोभिडको जोखिमको कारण धेरै ब्रतालुहरु आफ्नो घर फर्केको र आफ्नै घरको छतमा समेत पूजा गर्ने भएकाले विगतको वर्ष झैँ भीड होला जस्तो छैन, हाल सम्म ३५० घाट बुक भएको छ, करिब ४०० हाराहारीमा घाट बुक हुन्छ,’ सिंहले भने ।
बत्ति, टेन्ट, प्रसाद, लेवर, लगायत गरेर छठ व्यवस्थापनको लागि १६ लाख लाग्ने अनुमान समितिले गरेको छ । तर आर्थिक अवस्था कमजोर भएका र छठको पूजा गर्न इच्छुक व्यक्तिलाई निःशुल्क ३० वटा घाटको व्यवस्था गरेको र आवश्यकता अनुसार प्रसाद र लुगा समेत व्यवस्था गर्ने सिंहले जानकारी दिए ।
छठ पर्वमा सूर्यको उपासनाले सन्तान, निरोगिता, सुख ,समृद्धि र चर्म रोग निको हुने जनविश्वास छ । सत्य र अहिंसाप्रति मानवको रूची बढाउने तथा सबै जीवप्रति सहानुभूति राख्न अभिप्रेरित गर्नु यस पर्वको मुख्य विशेषता हो । सूर्य उपासना परम्पराको मोहक पद्धति मानिएको संसारमा यही एक यस्तो पर्व हो, जसमा अस्ताउँदो र उदाउँदो सूर्यलाई पूजा गरिन्छ ।
