काठमाडौं । पछिल्लो समय लगातार ओरालो लागेको सेयर बजार घट्नेक्रम मंगलबार रोकिएको छ । साताको पहिलो दिनदेखि नै ओरालो लागेको बजारले आज सुधारको संकेत देखाएको छ । आज सूचकमा ४ अंकको सुधार देखिएपनि कारोबार रकममा भने अघिल्लो दिनको तुलनामा १४ करोडले गिरावट आएको छ ।
मंगलबार सेयर बजार मापक सूचक नेप्से ४.८७ अंकले बढेर १२०८.०० विन्दुमा पुगेको छ । आज १६७ कम्पनीको २४ करोड ४६ लाख ६८ हजार २०९ रुपैयाँको कारोबार भएको छ । ८ लाख ५० हजार ३८६ कित्ता सेयर खरिदबिक्री भएका छन् ।
कारोबार भएका ११ वटा समूहमध्ये दुई समूहको बाहेका अन्यसबै समूहको सूचक हरियाली भएका छन् । आज निर्जीवन बीमा समूह र होटल समूहको सूचक घटेका छन् ।
निर्जीवन बीमा समूहको १२.८८ र होटल समूहको सूचक ८.९४ अंकले ओरालो लागेका छन् ।जीवन बीमा समूहको सूचक सबैभन्दा धेरै १५.३ अंकले बढेको छ । वाणिज्य बैंक समूह पनि ५.२ अंकले उकालो लागेको छ ।
कारोबार रकमको आधारमा एनआसी एशिया बैंकको सेयर शीर्ष स्थानमा रह्यो । यसको २ करोड ३६ लाख २८ हजार १ रुपैयाँको कारोबार भएको छ । कारोबारकै आधारमा नेपाल बैंक र प्रभु बैंक क्रमशः दोस्रो र तेस्रोमा रहेका छन् । नेपाल बैंकको १ करोड ५५ लाख र प्रभुको १ करोड ८ लाख रुपैयाँ भन्दा बढीको सेयर खरिद–बिक्री भएको छ ।
आज सबैभन्दा धेरै सबैको लघुवित्त र आँधीखोला लघुवित्तको सेयर मूल्य करिब १०% ले बढेको छ भने सिटी एक्सप्रेस फाइनान्सको सेयर मूल्य सबैभन्दा धेरै ६.८९% ले घटेको छ ।
