काठमाडौं । मैलुङ खोला जलविद्युत्को प्राथमिक साधरण सेयर (आइपीओ) नेपाल स्टक एक्सचेञ्ज (नेप्से)मा सूचीकृत भएके छ ।
कम्पनीले मंगलबार संस्थापक, सर्वसाधरण र स्थानीयको गरी कुल ३६ लाख ८१ हजार ४३० कित्ता सेयर नेप्सेमा सूचीकृत गरेको हो । नेप्सेमा सूचीकृत भएसँगै बुधबारदेखि कम्पनीको सेयर दोस्रो बजारमा कारोबारमा आउने छ । यद्यपि, बुधबार प्रिसेसनमा कारोबार हुन सकेन भने अर्को दिन मात्र कारोबारमा आउने छ ।
कम्पनीलाई कारोबारका लागि नेप्सेले MKJC संकेत चिह्न प्रदान गरेको छ । कम्पनीको सेयर पहिलो कारोबारका लागि नेप्सले ९५.७५ रुपैयाँदेखि २८७.२५ रुपैयाँसम्म ओपन रेञ्ज तोकेको छ । यसकै बीचमा रहेर पहिलो कारोबार शुरु हुनेछ ।
कम्पनीले दोस्रो चरणमा साउन १४ देखि प्रतिकित्ता १०० रुपैयाँ दरले ७ करोड ३६ लाख २८ हजार ६०० रुपैयाँ बराबरको ७ लाख ३६ हजार २८६ कित्ता आइपीओ विक्रीमा ल्याएको थियो ।
जसमा कुल २० लाख ६७ हजार ९६७ जनाले आवेदन दिएका थिए भने गोलाप्रथाबाट भाग्यमानी ६८ हजार ४६८ जनाले १० कित्ताका दरले सेयर हात पारेका थिए ।
कम्पनीको जारी पूँजी ३६ करोड ८१ लाख ४३ हजार रुपैयाँ रहेको छ । कम्पनी संस्थापक समूहको ७० प्रतिशत, स्थानीय बासीन्दाको १० प्रतिशत र सर्वसाधारणको २० प्रतिशत सेयर स्वामित्व संरचना रहेको छ ।
कम्पनीले रसुवा जिल्लाको डाँडागाउँमा ५ मेगावाटको मैलुङ खोला जलविद्युत् आयोजना बनाइरहेको छ ।
