काठमाडौं । अब अर्को बैंकको एटीएमबाट पैसा झिक्दा २० रुपैयाँभन्दा बढी तिर्न नपर्ने भएको छ । नेपाल राष्ट्र बैंकले क, ख र ग वर्गका बैंक तथा वित्तीय संस्थाहरुलाई एकीकृत निर्देशन जारी गर्दै अन्तर बैंक एटीएम प्रयोगमा २० रुपैयाँभन्दा बढी शुल्क लिन नपाउने व्यवस्था गरेको हो ।
यसअघि बैंकहरुले अन्तर बैंक एटीएम प्रयोगबापत प्रति कारोबार २५ रुपैयाँदेखि १०० रुपैयाँसम्म शुल्क लिने गरेका थिए । राष्ट्र बैंकका अनुसार एउटा बैंकको एटीएम कार्ड प्रयोग गरी अर्को बैंकको एटीएमबाट रकम निकाल्दा प्रति महिना दूई वटासम्म कारोबार निःशुल्क हुने छ । बैंकहरुले प्रति महिना दुई कारोबारको शुल्क लिन पाउने छैनन् ।
गत वर्ष कोरोना नियन्त्रणका लागि लगाइएको लकडाउनमा राष्ट्र बैंकले अन्तर बैंक एटीएम प्रयोगको शुल्क नलिन निर्देशन दिएको थियो भने लकडाउन हटेपछि बैंकहरुले आफूखुसी शुल्क लिने गरेका थिए ।
यस्तै, राष्ट्र बैंकले मोबाइल बैंकिङबाट अर्को बैंकको खातामा पैसा पठाउँदा ३० रुपैयाँभन्दा बढी शुल्क लिन नपाउने व्यवस्था गरेको छ । अब मोबाइल बैंकिङबाट अर्को बैंकको खातामा पैसा पठाउँदा ५० हजार रुपैयाँसम्मको कारोबार गर्दा १० रुपैयाँ, ५० हजारदेखि १ लाख रुपैयाँसम्म २० रुपैयाँ र १ लाख रुपैयाँभन्दा माथि ३० रुपैयाँ मात्र शुल्क लिन पाउने छन् ।
यसअघि मोबाइल बैंकिङबाट कारोबार गर्दा बैंकहरुले आफूखुशी शुल्क लिने गरेका थिए । सामान्यतया बैंकहरुले न्यूनतम शुल्क नै २० रुपैयाँ लिने गरेका थिए ।
मोबाइल र इन्टरनेट बैंकिङ सीमा बढ्यो
राष्ट्र बैंकले मोबाइल र इन्टरनेट बैंकिङको दैनिक कारोबार सीमा बढाएको छ । नयाँ व्यवस्था अनुसार अब मोबाइल बैंकिङबाट दैनिक (क्यूआर कोड सहित) बाट २ लाख रुपैयाँसम्म र इन्टरनेट बैंकिङबाट२० लाख रुपैयाँसम्मको कारोबार गर्न सकिने छ ।
यसअघि मोबाइल बैंकङमार्फत हुने कारोबारको अधिकतम सीमा १ लाख रुपैयाँ र इन्टरनेट बैंकिङमार्फत हुने कारोबारको सीमा १० लाख रहेको थियो ।
