काठमाडौं । कर्जा विस्तारमा विकास बैंकहरु आक्रमक बनेका छन् । तरलता अभावका बाबजूद विकास बैंकहरुले उल्लेख्य मात्रका ऋण लगानी गरेका हुन् ।
डेभलपमेन्ट बैंकर एशोसिएसन नेपालका अनुसार गत साता (भदौ १९-२५ गते) मात्र विकास बैंकहरुले ३ अर्ब १४ करोड ९९ लाख रुपैयाँ कर्जा लगानी गरेका छन् । यो सोही अवधिमा संकलन गरेको निक्षेपको तुलनामा ४ गुणा बढी हो ।
गत सातामा विकास बैंकहरुले जम्मा ७३ करोड निक्षेप संकलन गरेका छन् । एक साताको अवधिमा १५ वटा विकास बैंकहरुले ७३ करोड १४ लाख रुपैयाँ निक्षेप थपेका हुन् ।
गत साता राष्ट्रिय स्तरका विकास बैंकहरुको निक्षेप संकल ०.२४ प्रतिशतले वृद्धि भएको छ भने कर्जा विस्तार ०.७९ प्रतिशतले बढाउन सफल भएका छन् । यसैगरी सोही अवधिमा क्षेत्रिय स्तरका विकास बैंकको निक्षेप ०.३५ प्रतिशतले घटेको छ भने कर्जा ०.३८ प्रतिशतले बढेको छ ।
भदौ २५ गतेसम्म विकास बैंकहरुको कुल निक्षेप ४ खर्ब ८९ अर्ब २८ करोड १२ लाख रुपैयाँ पुगेको छ भने कर्जा लगानी ४ खर्ब ३६ अर्ब २३ करोड ५७ लाख रुपैयाँ रहेको छ ।
डेभलपमेन्ट बैंकर एशोसिएसनका अनुसार हाल १८ वटा विकास बैंक सञ्चालनमा रहे पनि यहाँ १५ वटाको मात्रै तथ्यांक समावेश गरिएको छ । उक्त तथ्याकंमा विजनेश कर्पोरेट डेभलपमेन्ट बैंक, सहारा विकास बैंक र साल्पा विकास बैंकको तथ्याकं समावेश गरिएको छैन् ।
