काठमाडौं । अब चितवनको भरतपुर विमानस्थलबाट भैरहवा सीधा उडान हुने भएको छ । काठमाडौं बाहिरबाट पनि अन्तरप्रदेश उडान विस्तार गर्ने क्रममा बुद्ध एयरले भरतपुर-भैरहवा रुटमा उडान गर्न लागेको हो ।
बुद्ध एयरका अनुसार १५ अगष्ट (साउन ३१) देखि भरतपुर–भैरहवा सीधा उडान हुने छ । साताको तीन दिन शनिबार, बुधबार र शुक्रबार जहाज चल्ने उडान तालिका तय गरिएको कम्पनीले जनाएको छ ।
यसअघि बुद्धले काठमाडौं बाहिर पोखरा–नेपालगन्ज रुटमा सीधा उडान शुरु गरिसकेको छ भने चाँडै नै पोखराबाट विराटनगर र सिमरामा पनि उडान भर्ने तयारी गरेको छ ।
