काठमाडौं । सेयर बजार झिनो अंकले वृद्धि भएको छ । बजार खुलेको केही समयदेखि ओरालो लागेको बजार अन्त्यमा न्यून अंकको सुधार आएर बन्द भएको हो ।
हाइड्रोपावर माइक्रोफाइनान्स समूहको सेयरमा चमक देखिए पनि बैंकिङ, फाइनान्स र बीमा समूहको सेयरमा गिरावट आउँदा नेप्सेमा दबाब देखिएको हो । सूचकमा झिनो सुधार आए पनि कारोबार रकम भने उत्साहजनक नै रहेको छ । आज १२ अर्ब बढीको कारोबार भएको छ ।
आज सेयर बजार मापक सूचक नेप्से १.२५ अंकले बढेर ३०८१.०५ विन्दुमा पुगेको छ । नेपाल स्टक एक्सचेन्जका अनुसार आज २२६ कम्पनीको १२ अर्ब १० करोड ३८ लाख ७१ हजार ८६२ रुपैयाँ बराबरको ३ करोड ३ लाख ४२ हजार ३५२ कित्ता सेयर किनबेच भएको छ ।
आज कारोबारमा आएका १३ वटा समूहमध्ये ७ समूहको परिसूचक राताम्मे भएक छन् भने ६ समूहको परिसूचकमा हरियाली छाएको छ । हाइड्रोपावर समूह सबैभन्दा धेरै २.४९ प्रतिशतले बढेको छ भने होटल समूह २.३२ प्रतिशतले घटेको छ ।
आज कारोबारमा आएका २२६ कम्पनीमध्ये १०९ कम्पनीको सेयर मूल्य बढेको छ भने १११ कम्पनीको मूल्यमा गिरावट आएको छ । ६ कम्पनीको मूल्य स्थिर रहेको छ ।
आज नेशनल हाइड्रोपावर कम्पनीको सर्वाधिक कारोबार भएको छ । यसको ३६ करोड रुपैयाँ बढीको कारोबार भएको छ । कारोबार रकमकै आधारमा युनाइटेड मोदी हाइड्रोपावरको ३५ करोड र सिनर्जी पावर ३२ करोड बढीको कारोबार सहित शीर्ष तीन स्थानमा रहे ।
झिनो अंकले बढेको बजारमा आज ८ कम्पनीको सेयर मूल्य पोजेटिभ सर्किट लागेको छ । सिनर्जी पावर, कालिका पावर, घलेम्दी, युनिभर्सल, ग्रीनलाइफ हाइड्रोपावर र जीवन विकास लघुवित्तको सेयर मूल्य ठ्याक्कै १० प्रतिशतले बढेको छ ।
यसैगरी, ङादी पावर र सीईडीबी हाइड्रोपावरका सेयरधनीले करिब १० प्रतिशत कमाएका छन् । रैराङ हाइड्रोपावरको पनि सेयर मूल्य ९ प्रतिशतभन्दा धेरैले बढेको छ ।
आज लक्ष्मी इक्वीटी फण्डका लगानीकर्ताले भने सबैभन्दा धेरै ६.९८ प्रतिशत गुमाएका छन् ।
