काठमाडौं । गौतमबुद्ध अन्तर्राष्ट्रिय विमानस्थलमा ‘क्यालिब्रेशन फ्लाइट’ (परीक्षण उडान) को तयारी गरिएको छ ।
वैशाखमै क्यालिब्रेशन फ्लाइट गर्ने तयारी गरिए पनि निषेधाज्ञाका कारण रोकिएको थियो । अहिले आन्तरिक तथा अन्तर्राष्ट्रिय हवाई उडान खुलेसँगै विमानस्थलले क्यालिब्रेशन फ्लाइट गर्ने तयारी गरेको हो ।
नागरिक उड्डयन प्राधिकरणका प्रवक्ता राजकुमार क्षेत्रीले चालू आर्थिक वर्षभित्रै उडान शुरु गर्ने गरी काम भइराखेको भए पनि कोभिडका कारणले केही ढिलाइ हुन गएको बताए ।
कोभिडका कारण निषेधाज्ञा हुँदा उडानहरु बन्द रहेको थियो । जसका कारण क्यालिब्रेशन फ्लाइटको काम रोकिएको उनले बताए । ‘चालू आव भित्रै उडान शुुरु गर्ने गरी काम गरिरहेका थियौं, कोभिडका कारण केही ढिलाई भएको छ,’ क्षेत्रीले चाणक्य पोष्टसँग भने, ‘अहिले हवाई उडान खुला भएको छ । अब चाँडै क्यालिब्रेशन उडान गर्नेछौं ।’
क्यालिब्रेशन फ्लाइट लागि विदेशबाट जहाज ल्याउनुपर्ने हुन्छ । विमानस्थलहरुमा उडान बन्द हुँदा सो परीक्षणको काममा ढिलाई भएको हो । हाल विशेष फ्लाइट मार्फत जहाज ल्याउने तयारी भइरहेको छ । त्यसका लागि विदेशबाट उडानको परमिट लिनु पर्ने हुन्छ भने परमिट स्वीकृत हुनका लागि १ साता जति लाग्ने अनुमान उनको छ ।
प्रवक्ता क्षेत्रीले उडानका लागि इन्टरनेस्नल सिभिल कर्पोरेशनसँग छलफल हुने र स्वीकृति पछि उडान गरिने बताए ।
९७.४८ प्रतिशत निर्माण सम्पन्न
विमानस्थलको निर्माण अन्तिम चरणमा पुगेको छ । प्राधिकरणका अनुसार असार दोस्रो सातासम्म विमानस्थलको ९७.४८ प्रतिशत भौतिक निर्माण पूरा भएको छ ।
प्राधिकरणका अनुसार हालसम्म वित्तीयतर्फ समग्रमा ७६ प्रतिशत प्रगति भएको छ । गौतमबुद्ध विमानस्थलका लागि चालू आवमा ३ अर्ब २८ करोड २३ लाख रुपैयाँ छुट्याइएकोमा हालसम्म ८९ करोड २९ लाख रुपैयाँ खर्च भएको छ ।
हालसम्म विमानस्थलको रनवे तर्फको नवे लाइट जडान कार्य भइसकेको छ । ट्याक्सी वे लाईट जडान कार्य अन्तिम चरणमा रहेको छ । एयर कन्डिस्नीङ सिस्टम जडान तथा इनटेरियर फिनिसिङको काम भइरहेको छ । साथै विमानस्थल प्रवेशद्धार निर्माण कार्य पूरा भएको छ ।
आईसीबी ओटुमा इक्यूपमेन्ट जडानको काम सकिसकेको छ । प्रवक्ता क्षेत्रीका अनुसार चिनियाँ कम्पनी नर्थवेस्ट सिभिल एसिएशन एयरपोर्ट कन्स्ट्रक्सन ग्रुपले विमानस्थलको भौतिक संचना निर्माणको काम सकेको छ । टर्मिनल, प्रशासनिक भवन, अग्नी निवारण तथा कन्ट्रोल टावरको काम सकिएको हो ।
विमानस्थलमा उपकरण ल्याउने र जडान गर्ने जिम्मा एरोनटीकल रेडियो अफ थाइल्याण्डले पाएको थियो । जडानको काम थाइ जनशक्ति र चिनियाँ जनशक्तिले गरेका थिए । यसअघि गौतमबुद्ध अन्तर्राष्ट्रिय विमानस्थल २०२१ जनवरीमा सञ्चालन गर्ने तयारी रहेको थियो ।
विमानस्थल निर्माण २ चरणमा भइरहेको छ । आइसीबी १ र आइसीबी २ गरी दुई चरणमा काम भइरहेको छ । भ्याटसहित ६ अर्ब ८२ करोडको रुपैयाँ आइसीबी १ को बजेट रहेको छ । आइसीबी २ को बजेट ५० करोड रुपैयाँ रहेको छ । शुरुमा आइसीबी १ का लागि ६ अर्ब २२ करोड रुपैयाँ बजेट विनियोजन गरिएको थियो ।
यस विमानस्थलमा ३ हजार मिटर लम्बाई र ४५ मिटर चौडाईको धावनमार्ग बनेको छ । यो आयोजना २०१५ मा निर्माण शुरु भएको थियो । सन् २०१८ डिसेम्बरमा सक्ने लक्ष्य राखिए पनि विविध कारण हालसम्म सम्पन्न हुनसकेको छैन ।
