काठमाडौं । यस वर्ष पनि सडक विभागले लक्ष्य अनुसार काम गर्न नसक्ने देखिएको छ । विगतका वर्षमा पनि विनियोजित बजेट खर्च गर्न नसकेको विभागको चालू वर्ष पनि सोही प्रवृति दोहोरिने देखिएको हो ।
हालसम्म विनियोजित बजेटमध्ये करिब आधा मात्र खर्च भएको छ । चालू आर्थिक वर्ष २०७७/७८ का लागि कुल ११७ अर्ब रुपैयाँ बजेट विनियोजन गरिएकोमा हालसम्म करिब ५३ प्रतिशत (करिब ६२ करोड रुपैयाँ) मात्र खर्च भएको विभागले जनाएको छ ।
विभागका सूचना अधिकारी रमेशकुमार सिंहले यस वर्ष पनि कोरोनाका कारण विनियोजित बजेट पूरै खर्च नहुने अवस्था आएको बताए । ‘यो वर्ष कोरोनाका कारण उपलब्धी कम देखिएको छ, अहिले मनसुन शुरु भएकोले सोचे जस्तो काम गर्न सकिएको छैन,’ सिंहले चाणक्य पोष्टसँग भने ।
चालू आर्थिक वर्षको ११ महिनामा ४७३ किलोमिटर नयाँ सडक कालोपत्र भएको उनले जानकारी दिए । जुन लक्ष्यको २६ प्रतिशत मात्र हो । सडक विभगले चालू आर्थिक वर्षमा १८०० किलोमिटर सडक कालोपत्र गर्ने लक्ष्य राखेको थियो ।
यस्तै, चालू वर्षमा ३०८ किलोमिटर सडकमा ग्राभेल निर्माण भएको विभागले जनाएको छ । विभागले १ हजार किलोमिटर सडक ग्रावेल निर्माण गर्ने लक्ष्य राखेको थियो ।
सिंहका अनुसार चालू आवको सो अवधिमा १७० किलोमिटर नयाँ ट्रयाक खुल्ला भएको बताए । सरकारले ५०० किलोमिटर सडकमा नयाँ ट्रयाक खुल्ला गर्ने लक्ष्य राखेको थियो ।
साथै ५६५ किलोमिटर बढि सडक विस्तारका काम सम्पन्न भएको छ । यस्तै पुनर्निर्माण अन्तर्गत २१३ किलोमिटर सडक कालोपत्र भएका छन् । पुनर्निर्माण तर्फ ३३४ किलोमिटर सडक चालू आवभित्र पुननिर्माण गर्ने लक्ष्य राखिएको थियो ।
देशभर झण्डै ३४१ किलोमिटर सडकमा खाल्टा खुल्टी टाल्टु गर्ने काम भएको छ । चालू आव भित्र ७२९ किलोमिटर सडक टालटुल गर्ने लक्ष्य राखिएको थियो ।
सडक विभागले दिएको जानकारी अनुसार चालू आर्थिक वर्षमा देशभर १०४ पुल निर्माण सम्पन्न भएका छन् । ३८५ पुल निर्माणको काम भइरहेको छ । चालू आर्थिक वर्षभित्र ३ सय पुल निर्माण सम्पन्न गर्ने लक्ष्य सडक विभागको रहेको थियो ।
पछिल्लो समय कोभिड १९ को दोस्रो लहर शुरु भएपछि सरकारले वैशाख १६ गतेबाट देशभर निषेधाज्ञ जारी गरेको थियो । सो कारण सडक निर्माणका धेरै कामले गति लिन सकेका थिएनन् । निषेधाज्ञ खुकुलो भएसँगै घर गएका मजदुर काममा आउन थालेको सिंहले बताए । उनले अबको १ साता भित्र झरीले समस्या नगरे सडक निर्माणले गति लिने बताए ।
