काठमाडौं । ललितपुर महानगरपालिकाले कोरोना सङ्क्रमणबाट ज्यान गुमाएका व्यक्तिको परिवारलाई १ लाख रुपैयाँ आर्थिक सहयोग गर्ने भएको छ ।
शुक्रबार पत्रकार सम्मेलन गर्दै ललितपुर महानगरपालिकाका प्रमुख चिरीबाबु महर्जनले महानगर भित्र स्थायी रूपमा बसोबास गर्ने व्यक्तिको कोरोना संक्रमित भइ उपचारको क्रममा मृत्यु भएमा निजको परिवारलाई १ लाख रुपैयाँ सहयोग गर्ने निर्णय गरिएको जानकारी दिए ।
त्यस्तै, आइसीयू तथा भेन्टिलेटरमा उपचार गरेर निको भएकाहरूलाई जनही ५० हजार रुपैयाँ र अस्पताल भर्ना भएर निको भएकाहरूलाई जनही २५ हजार रुपैयाँ प्रदान गरिने उनले बताए ।
महानगरपालिकाबाट सहयोग लिनका लागि सिफारिसपत्र लगायत आवश्यक कागजपत्र आवश्यक पर्ने पनि जनाइएको छ ।
