काठमाडौं । रुरु जलविद्युत परियोजनालाई उछिन्दै राधी विद्युत् कम्पनी सेयर बजारमा सबैभन्दा महँगो सेयर मूल्य हुने हाइड्रोपावर कम्पनी बनेको छ ।
पछिल्लो समय लगातार भाउ बढ्दै आएको राधीको सेयर मूल्य आज (११ः१५ बजेसम्म) प्रतिकित्ता ९५ रुपैयाँ बढेर ११६० रुपैयाँ पुगेसँगै सबैभन्दा धेरै सेयर मूल्य हुने कम्पनी बनेको हो ।
यसअघि सबैभन्दा धेरै सेयर मूल्य हुने कम्पनी बनेको रुरु भने दोस्रो स्थानमा झरेको छ । आज रुरुको प्रतिकित्ता १०५६ रुपैयाँमा कारोबार भइरहेको छ ।
राधीले गत आर्थिक वर्षको मुनाफाबाट आकर्षक ३६.५ प्रतिशत बोनस सेयर लाभांश घोषणा गरेसँगै तीनसातादेखि निरन्तर सेयर भाउ बढीरहेको छ । पछिल्लो दुई सातामै कम्पनीको सेयर मूल्य प्रतिकित्ता करिब ५०० रुपैयाँले बढेको छ ।
हाल ४७ करोड ३५ लाख रुपैयाँ चुक्ता पूँजी रहेको राधीको बोनस सेयर वितरण पछिचुक्ता पूँजी ६४ करोड ६३ लाख रूपैयाँ पुग्नेछ।
हाल नेप्सेमा सूचीकृति ३४ वटा हाइड्रोपावर कम्पनी सूचीकृत छन् । जसमा रुरु रराधी मात्र १ हजारभन्दा माथि सेयरमूल्य हुने कम्पनी हुन् ।
