काठमाडौं । राधी विद्युत् कम्पनी सेयर बजारमा १ हजार रुपैयाँ माथि सेयर मूल्य हुने दोस्रो कम्पनी बनेको छ ।
आज (१२ बजेसम्म) कम्पनीको सेयर मूल्य प्रतिकित्ता ६१ रुपैयाँ बढेर १०३० रुपैयाँ पुगेको छ । यससँगै राधी नेप्सेमा सूचीकृत हाइड्रोपावर कम्पनीमध्ये दोस्रो महँगो सेयर मूल्य हुने कम्पनी बनेको छ ।
राधीले गत आर्थिक वर्षको मुनाफाबाट आकर्षक ३६.५ प्रतिशत बोनस सेयर लाभांश घोषणा गरेसँगै दुईसातादेखि निरन्तर सेयर भाउ बढीरहेको छ । पछिल्लो दुई सातामै कम्पनीको सेयर मूल्य प्रतिकित्ता करिब ४०० रुपैयाँले बढेको छ ।
हाल नेप्सेमा सूचीकृति ३४ वटा हाइड्रोपावर कम्पनीमध्ये रुरु जलविद्युत् परियोजना सबैभन्दा महँगो सेयर मूल्य हुने कम्पनी हो । आज रुरुको सेयर प्रतिकित्ता १०६० रुपैयाँमा कारोबार भइरहेको छ ।
हाल ४७ करोड ३५ लाख रुपैयाँ चुक्ता पूँजी रहेको कम्पनीको बोनस सेयर वितरण पछिचुक्ता पूँजी ६४ करोड ६३ लाख रूपैयाँ पुग्नेछ।
