काठमाडौं । महिला लघुवित्त वित्तीय संस्थाको सेयर मूल्य डेढ महिना (३० कारोबार दिन)मै ७ गुणा बढीले बढेको छ ।
गत चैत ३ गतेदेखि दोस्रो बजारमा कारोबारमा आएको लघुवित्तको सेयर मूल्य ३० कारोबार दिनमा लगातार पोजेटिभ सर्किट लागेर ७ गुणा भएको छ । ४३८ रुपैयाँमा पहिलो कारोबार शुरु भएको कम्पनीको सेयर मूल्य सात गुणाले बढेर आज प्रतिकित्ता ३१२५ रुपैयाँ पुगेको छ ।
कारोबारमा आएको ६ हप्ता बितिसके पनि अझै कम्पनीको सेयरको सप्लाई भने आउन सकोके छैन । हरेक दिन खरिदकर्ताको उच्च चाप रहे पनि विक्रीकर्ता अत्यन्त न्यून रहेको छन् ।
डेढ महिनाको अवधिमा कम्पनीको जम्मा करिब ६ हजार कित्ता मात्र कारोबार भएको छ भने सो अवधिमा जम्मा ४ दिन मात्र १ हजार बढी कित्ता कारोबार भएको छ ।
लघुवित्तले माघ २८ गतेदेखि प्रतिकित्ता १०० रुपैयाँ दरले ४ करोड रुपैयाँ बराबरको ४ लाख कित्ता आइपीओ विक्रीमा ल्याएको थियो । जसमा गोलाप्रथाबाट भाग्यमानी ३७ हजार ५०० जनाले १० कित्ताका दरले सेयर हात पारेका थिए भने १४ लाख ९९ हजार १८२ जनाको हात खाली भएको थियो ।
नेप्सेमा लघुवित्तको सर्वसाधरण तर्फको जम्मा ४ लाख कित्ता सेयर सूचीकृत छ । सर्वसाधरणको सेयर संख्या कम भएको र वित्तीय अवस्था पनि बलियो रहेकाले लघुवित्तको सेयरमा आकर्षण देखिएको हो । आइपीओ निष्काशन पछि लघुवित्तको चुक्ता पूँजी १० करोड रुपैयाँ पुगेको छ ।
