काठमाडौं । अबदेखि घरमै बसेर अनलाइनबाटै आफ्नो घरजग्गाको नक्सा हेर्न, आफैं प्रिन्ट गर्न मिल्ने भएको छ । सरकारले आजदेखि ‘मेरो कित्ता’ प्रणाली शुभारम्भ गर्दै यस्तो व्यवस्था गर्न लागेको हो ।
आज प्रधानमन्त्री केपी शर्मा ओलीले उक्त प्रणालीको शुभारम्भ गरेका हुन् । यो प्रणाली कार्यन्वयनमा आएसँगै आफ्नो जग्गाको नक्सा हेर्न, प्रिन्ट गर्न तथा प्लट रजिस्ट्रर, फिल्डबुक प्रिन्ट, फिल्ड रेखांकन लगायत सेवाको अनलाइनबाटै बुझाउन सकिने सकिने नापी विभागले जनाएको छ ।
‘मेरो कित्ताकाे वेबसाइट’ लगइन गरेर आफ्नो विवरण राखी आफ्नो जग्गाको नक्सा हेर्न, प्रिन्ट गर्न राजश्व तिर्न लगायत सेवा लिन सकिने विभागले जनाएको छ । सेवाग्राहीलाई सहजरुपमा छिटोछरितो सेवा दिन तथा प्रविधिमैत्री बनाउन यो सेवा शुरु गरिएको विभागको भनाइ छ ।
विभागका अनुसार यो सेवा पहिलो चरणमा काठमाडौं उपत्यकाका डिल्लीबजार, कलंकी र भक्तपुर मालपोत कार्यालयमा लागू हुने छ भने क्रमशः देशभर कार्यान्वयनमा ल्याइने विभागले जनाएको छ ।
भूमि व्यवस्थापन तथा अभिलेख विभागले यसअघि नै देशभरका मालपोत कार्यालयलाई ल्यान्ड रेकर्ड इन्फर्मेसन प्रणाली (एलआरआइएस) सँग जोडिसकेकेको छ ।
