घरजग्गा कारोबारमा हरेक महिना नयाँ रेकर्ड, यसकारण बढ्दै छ कारोबार
चाणक्य पोष्ट
प्रकाशित : 9:16 am, शुक्रबार, चैत २७, २०७७

काठमाडौं । घरजग्गा कारोबारमा हरेक महिना नयाँ रेकर्ड कायम भएको छ । गत वर्ष कोरोनाका कारण सुस्ताएको घरजग्गा कारोबार पछिल्लो समय अर्थतन्त्र चलायमान भएसँगै गति लिन थालेको हो ।

 

चालू आर्थिक वर्षको फागुनसम्म कुल साढे ११ लाख बढी घरजग्गा सम्बन्धी कारोबार भएका छन् । सो अवधिमा घरजग्गा किनबेच, नामसारी, रोक्का, फुक्का लगायत गरी सो संख्यामा कारोबार भएको हो ।

 

चालू आवमा भदौमा सबैभन्दा कम ४ हजार ९८५ घरजग्गा किनबेच भएका थिए भने फागुनमा सबैभन्दा धेरै ७६ हजार ४९१ घरजग्गा किनबेच भएका छन् ।

 

भूमि व्यवस्थापन तथा अभिलेख विभागको तथ्यांक अनुसार चालू आवको फागुनसम्म कुल ११ लाख ६३ हजार ६७० वटा घरजग्गा सम्बन्धी कारोबार भएका छन् । यो गत वर्षको सोही अवधिको तुलनामा ९७ हजार ५२७ वटाले बढी हो । गत वर्षको फागुनसम्म १० लाख ६६ हजार १४३ वटा घरजग्गा सम्बन्धी कारोबार भएको थियो ।

 

चालू आवको साउन यता हरेक महिना घरजग्गा कारोबारमा नयाँ रेकर्ड बन्दै गएको हो । साउनमा कुल ५८ हजार घरजग्गा कारोबार भएका थिए । जसमा ३७ हजार ९७० वटा किनबेच भएका थिए । फागुनसम्म आइपुग्दा  त्यो संख्या ४ गुणाभन्दा धेरैले बढेको छ ।

 

 

साउनको तुलनामा भदौमा घरजग्गा कारोबार सुस्त देखिए पनि त्यसयता भने हरेक महिना कारोबार बढ्दै गएको छ । भदौमा कुल ५५ हजार १५८ घरजग्गा सम्बन्धी काम भएका थिए । जसमध्ये १४ हजार ९८५ घरजग्गा किनबेच भएका थिए भने १८ हजार ७७९ घरजग्गा रोक्का, ११ हजार ५९९ घरजग्गा फुकुवा गरिएको थियो । सो महिनामा २ वटा मात्र अपार्टमेन्ट किनबेच भएको थियो ।

 

यसैगरी, असोजमा १ लाख ४ हजार ९२८ घरजग्गा कारोबार भएका थिए । सो महिनामा ३६ हजार ४३६ घरजग्गा रोक्का, १८ हजार ११८ फुकुवा र ३६ हजार ६८९ घरजग्गा किनबेच भएका थिए । सो महिना १० वटा मात्र अपार्टमेन्ट कारोबार भएको थियो ।

 

कात्तिकमा पनि १ लाखभन्दा बढी घरजग्गा सम्बन्धी काम भएका छन् । विभागका अनुसार यस महिना १ लाख ४ हजार ९२८ वटा घरजग्गा कारोबार भएको थियो । जसमा ३६ हजार ३३६ घरजग्गा रोक्का, १८ हजार ११८ फुकुवा र २६ हजार ६८९ घरजग्गा किनबेच भएका छन् ।

 

यसैगरी, मंसिरमा १ लाख ६८ हजार ६ घरजग्गा सम्बन्धी काम भएको थियो । यो महिना ५३ हजार २८१ घरजग्गा रोक्का, ३२ हजार २६० फुकुवा र ६१ हजार ४५१ घरजग्गा किनबेच भएको विभागको तथ्यांकले देखाएको छ ।

 

पुस महिनामा कुल २ लाख १४ हजार ४६० घरजग्गा सम्बन्धी काम भएका छन् । सो मध्ये ६९ हजार १८२ घरजग्गा रोक्का, ४० हजार २६५ फुकुवा र ७६ हजार ५३२ वटा घरजग्गा खरिद विक्री भएका छन् । गरिएका छ । यो महिना ७१ अपार्टमेन्ट कारोबार भएका छन् ।

 

यसैगरी, माघमा कुल २ लाख ११ हजार ९०८ घरजग्गा सम्बन्धी कारोबार भएका छन् । सोमध्ये ७६ हजार ४९१ घरजग्गा किनबेच भएका छन् । फागुनमा देशभर कुल २ लाख १४ हजार ४९१ घरजग्गा कारोबार भएका छन् । सोमध्ये ७६ हजार ४९१ वटा किनबेच भएका छन् ।

 

दैनिक १७०० घरजग्गा किनबेच

 

चालू आवको फागुनसम्म रोक्का, फुक्का, नामसारी, किनबेच गरी कुल साढे ११ लाख बढी घरजग्गा कारोबार भएको छन् । सोमध्ये ८ महिनाको अवधिमा ४ लाख ७ हजार ९५ घरजग्गा किनबेच भएका छन् ।

 

यस आधारमा ८ महिनाको अवधिमा औसतमा दैनिक १७०० घरजग्गा किनबेच भएका छन् । चालू आवमा भदौमा सबैभन्दा कम ४ हजार ९८५ घरजग्गा किनबेच भएका थिए भने फागुनमा सबैभन्दा धेरै ७६ हजार ४९१ घरजग्गा किनबेच भएका छन् ।

 

चालू आर्थिक वर्षमा घरजग्गा सम्बन्धी कारोबारबाट ३७ अर्ब ९८ करोड ४५ लाख ४१ हजार रुपैयाँ बराबरको राजश्व संकलन भएको छ । उक्त कर रजिस्ट्रेसन दस्तुर, सेवा शुल्क, वाग्मती सभ्यता शुल्क, पूँजीगत लाभकर लगायत शिर्षकमा संकलन भएको हो ।

 

किन बढ्दै छ कारोबार ?

 

घरजग्गाको कारोबार बढ्नुको मुख्य कारण कोरोनाले शिथिल भएको अर्थतन्त्र क्रमशः चलायमान हुनु नै हो । कोरोनाले बन्द भएका उद्योगधन्दा, व्यवसाय पछिल्लो समयमा संचालनमा आउँदा मानिसको आयआर्जनमा वृद्धि हुँदै गएको छ ।

 

विश्वव्यापी रुपमा कोरोनाको खोप आइसकेको र नेपालमा समेत लगाउन थालिसकिएकाले मानिसहरु आशावादी हुँदै गएका छन् । सबै किसिमको व्यापार व्यवसायले गति लिँदै गर्दा मानिसहरु व्यापार व्यवसायबाट कमाएको पैसा घरजग्गामा लगानी गर्न थालेका छन् । जसले हरेक महिना कारोबार बढ्दै गएको हो ।

 

कोरोनाको त्राास कायमै रहेकाले मानिसहरुले अन्य क्षेत्रको भन्दा घरजग्गामा गरेको लगानी सुरक्षित हुने देखेपछि पनि यसको कारोबार बढ्न पुगेको हो ।

 

यसैगरी, पछिल्लो समय बैंकको ब्याजदर ५ वर्ष यताकै सस्तो भएको छ । अहिले सहजै र सस्तो ब्याजदरमा ऋण पाइने भएकाले नियमित आम्दानी भएका मान्छेहरु ब्याज सस्तो भएको मौका छोपी घरजग्गा जोड्न थालेका छन् । जसले कारोबार बढ्न सहयोग पुगेको छ ।

 

यस्तै, पछिल्लो समय सेयर बजारले इतिहास सर्वाधिक विन्दुमा पुगेको छ । सेयर बजारबाट कमाएका व्यक्तिहरु आफ्नो कमाइ सुरक्षित गर्न घरजग्गामा लगानी गर्न थालेका छन् । सेयर बजारबाट कमाएको पैसा घरजग्गामा डाइभर्ट हुन थालेकाले यसको कारोबार बढेको जानकारहरु बताउँछन् ।