काठमाडौं । गत हप्ता २५ अंकले घटेको सेयर बजारले यो हप्ता पनि ओरालो यात्रा कायमै राखेको छ । पछिल्लो समयको शेयर बजारमा देखिएको पूँजीगत लाभकर गणना सम्बन्धी विवादका कारण लगानीकर्ता उत्साहि हुन सकेका छैन् ।यस विवादलाई सरोकारवाला निकायहरुले समयमै सम्बोधन नगर्दा बजारले गति लिन सकेको छैन् ।
सेयर बजार मापक सूचक नेप्से आइतबार ४.८४ अंकले घटेर १२३३.७१ विन्दुमा आइपुगेको छ । १६६ कम्पनीको ३१ करोड १७ लाख ५६ हजार ८५६ रुपैयाँ बराबरको सेयर कारोबार भएको छ । ११ लाख ४५ हजार ५०७ कित्ता सेयर खरिदबिक्री भएका छन् ।
कुल १२ वटा समूहको कारोबार भएकामा ५ समूहका सूचक उकालो लागेका छन् भने ७ वटा समूहको सूचक ओरालो लागेका छन् । आज होटल समूहको सूचक सबैभन्दा धेरै १६.४६ अंकले बढेको छ भने जीवन बीमा समूहको सबैभन्दा धेरै ३७.६६ अंकले ओरालो लागेको छ । वाणिज्य बैंक समूहको सूचक ५.०३ अंकले घटेको छ ।
कारोबार रकममा रसुवागढी हाइड्रोपावरको सबैभन्दा धेरै ४ करोड ५९ लाख रुपैयाँभन्दा धेरैको कारोबार भएको छ । कारोबार रकमकै आधारमा दोस्रो र तेस्रो स्थानमा क्रमशः सान्जेन जलविद्युत कम्पनी र नेपाल इन्भेष्टमेन्ट बैंक परेका छन् । सबैभन्दा धेरै साल्ट ट्रेडिङ कर्पोरेसनका लगानीकर्ताले ९.११% का दरले कमाएका छन् ।
