काठमाडौं । सेयर बजारमा उच्च अंकको गिरावट आएको छ । गतसाता करिब ४८ अंकले घटेको बजार यससाता एकैदिन ५१ अंकले घटेको हो ।
पछिल्लो केही साता यता सूचकसँगै कारोबार रकम पनि घट्दै गएको छ । फागुन दोस्रोसातासम्म औसतमा दैनिक ९ अर्ब कारोबार हुँदै आएकोमा पछिल्लो दुई सातामै घटेर ५ अर्बमा सीमित भएको छ ।
सूचक र कारोबार रकम दुवै निरन्त घट्न थालेपछि लगानीकर्ता झनै निराशावादी हुन थालेका छन् । बजारलाई खास प्रभाव पार्ने कुनै नीतिनियममा परिवर्तन नभएपनि राजनीतिक अस्थिरताका कारण लगानीकर्ता हतोत्साहित हुँदै गएको आकलन गरिएको छ ।
आज सेयर बजार मापक सूचक नेप्से ५१.२३ अंकले घटेर २४०७.२५ विन्दुमा आइपुगेको छ । नेपाल स्टक एक्सचेन्जका अनुसार आज २११ कम्पनीको ४ अर्ब ९५ करोड २७ लाख २२ हजार १९५ रुपैयाँ बराबरको ९९ लाख ३ हजार ७०४ कित्ता सेयर किनबेच भएका छन् ।
आइतबार कारोबारमा आएका १३ वटा समूहमध्ये हाइड्रोपावर र होटल तथा पर्यटन समूह् बाहेक बाँकी ११ समूहको परिसूचक राताम्मे भएका छन् । होटल समूह सबैभन्दा धेरै ६१.१२ अंकले बढेको छ भने जीवन बीमा समूहको परिसूचक सबैभन्दा धेरै ४५३.९ अंकले घटेको छ ।
कारोबारमा आएका २११ कम्पनीमध्ये २२ कम्पनीको सेयर मूल्य बढेको छ भने १७२ कम्पनीको मूल्यमा गिरावट आएको छ । १६ कम्पनीको मूल्य स्थिर रहेको छ ।
आज माथिल्लो तामाकोशीको सर्वाधिक कारोबार भएको छ । यसको सबैभन्दा धेरै ४४ करोड ५६ लाख रुपैयाँ बढीको कारोबार भएको छ । कारोबार रकमकै आधारमा नेपाल इन्फ्रस्ट्रक्चर बैंक २७ करोड र नबिल बैंक २० करोडको कारोबार सहित शीर्ष तीनमा रहे ।
उच्च अंकले घटेको बजारमा पनि आज ४ कम्पनीको सेयर मूल्यमा पोजेटिभ सर्किट लागेको छ । चन्द्रागिरी हिल्स, अपर तामाकोशी, घलेम्दी हाइड्रोपावर र पञ्चकन्या माइ हाइड्रोपावरका सेयरधनीले करिब १० प्रतिशत कमाएका छन् ।
घट्दो बजारमा हिमालयन पावर कम्पनीको सेयर मूल्यमा नेगेटिभ सर्किट लागेको छ । यसका सेयरधनीले करिब १० प्रतिशत गुमाएका छन् ।
