काठमाडौं । सेयर बजारमा उछाल आएको छ । पछिल्लो दुई सातामा करिब २२५ अंकले घटेको बजार आज उच्च अंकले कमब्याक भएको हो ।
पछिल्लो समय बैंकिङ प्रणालीमा तरलता कम हुँदै गएपछि ब्याजदर बढ्ने हल्लाले लगानीकर्ताको मनोबल गिरेको थियो । त्यस्तै, राजनीतिक अस्थिरता छाउने आंशकामा पनि लगानीकर्ता निराश हुँदा बजार ओरालो लागेको थियो । तर, केही दिनमै ती हल्ला चिर्दै लगानीकर्ता आशावादी हुँदा बजारले फेरि गति लिएको छ ।
सूचकले उच्च अंकको फड्को मारे पनि कारोबार रकम भने ६ अर्ब हाराहारीमै सीमित भएको छ । गतसाता औसतमा दैनिक साढे ८ अर्बको कारोबार हुँदै आएकोमा यससाता घटेर दैनिक ६ अर्ब हाराहारीमा सीमित भएको छ ।
यस्तै, प्रफिट बुक गर्नेहरु हाबी हुँदा पनि बजारमा चाप परेको थियो । तर, बजार घटेको मौकामा सेयर उठाएकाहरु फेरि सलबलाउँदा बजारले गति लिन थालेको लगानीकर्ताहरु बताउँछन् ।
आज सेयर बजार मापक सूचक नेप्से ९०.२७ अंकले बढेर २५०६.२८ विन्दुमा पुगेको छ । नेपाल स्टक एक्सचेन्जका अनुसार आज २०६ कम्पनीको ६ अर्ब ५ करोड ८१ लाख ४ हजार ३१६ रुपैयाँ बराबरको १ करोड ६६ लाख २२ हजार ७६३ कित्ता सेयर किनबेच भएका छन् ।
सोमबार कारोबारमा आएका १३ वटै समूहको परिसूचकमा हरियाली छाएको छ । जीवन बीमा समूहको परिसूचक सबैभन्दा धेरै ५७१.९४ अंकले बढेको छ ।
कारोबारमा आएका २०६ कम्पनीमध्ये १९० कम्पनीको सेयर मूल्य बढेको छ भने १२ कम्पनीको मूल्यमा गिरावट आएको छ । ४ कम्पनीको मूल्य स्थिर रहेको छ ।
आज नेपाल इन्फ्रास्ट्रक्चर बैंकको सर्वाधिक कारोबार भएको छ । यसको सबैभन्दा धेरै ५३ करोड २३ लाख रुपैयाँ बढीको कारोबार भएको छ । कारोबार रकमकै शिखर शिखर इन्स्योरेन्स २३ करोड र नबिल बैंकको २० करोडको कारोबार सहित शीर्ष तीनमा रहे ।
उच्च अंकले बढेको बजारमा आज आधादर्जन कम्पनीको सेयर मूल्यमा पोजेटिभ सर्किट लागेको छ । सूर्योदय लघुवित्त, लिबर्टी इनर्जी र चन्द्रागिरी हिल्सका सेयरधनीले ठ्याक्कै १० प्रतिशत कमाएका छन् ।
यसैगरी, किसान लघुवित्त, इन्फिनिटी लघुवित्त र हिमालयन पावर कम्पनीको सेयर मूल्य पनि करिब १० प्रतिशतले बढेको छ भने श्री इन्भेष्टमेन्ट, नेशनल हाइड्रो, निर्धन उत्थान लघुवित्त र नेरुडे लघुवित्तको मूल्य ९ प्रतिशतभन्दा धेरैले बढेको छ ।
९० अंकले बढेको बजारमा आज एनएमबी ५० म्युचुअल फण्डका लगानीकर्ताले भने सबैभन्दा धेरै ३.४५ प्रतिशत गुमाएका छन् ।
